郭晉安歐倩怡嗌交當討論 拖手證恩愛
張繼聰憑「潮潮」一角成功出位，前晚專誠帶老婆謝安琪和囝囝一齊睇劇集結局。而日前被傳吵大鑊而分房睡的郭晉安和歐倩怡，拖手到場以行動證實恩愛如昔。
郭晉安、王祖藍、萬綺雯及王菀之等《老表，你好嘢！》演員，前晚夾錢設宴七圍慰勞幕後兼睇兩小時大結局。有傳郭晉安和老婆歐倩怡為囝囝嘈交，要分房瞓一個月，拖實老婆到場的安仔即時否認：「老婆為仔女勞心勞力，就算為小朋友嗌交都係向好嗰方面，總之我哋冇影響感情，仲好恩愛。」歐倩怡亦澄清：「我哋之間討論多過嗌交。」
張繼聰振夫綱
至於張繼聰因演「潮潮」一角備受好評，成功擺脫女尊男卑形象，前晚他帶老婆謝安琪和囝囝張瞻出席，乘機振夫綱；而林盛斌（Bob）亦與一家大細到場撐收視。而早前揚言收視過40點會娶女友李亞男的王祖藍則單拖到場兼反口：「等歐倩怡生多個，我就考慮結婚啦！（佢哋分房瞓點生？）咁多謝佢哋咁幫我。」
「細細粒」鯨吞Pizza
另外，「細細粒」陳嘉佳表示若大結局收視超越40點，會表演食40吋Pizza，「鬼妹」陳明恩則稱會在最凍時候穿很多衫游水。細細粒又稱因此劇帶挈，多了5位數收入：「希望可以衝破6位啦！（你推咗部三級片，唔係都有啦！）喺套戲我要講粗口，怕影響形象，而且要我去泰國，但我嗰段時間撞期要拍劇。」
文：影視組