郭富城犯太歲拒做蛇新郎

恭喜發財！郭富城趁着大年初一，穿上一身金色唐裝、舞起獅頭向《東方日報》讀者拜年，寓意蛇年大發。他稱十年以來即使工作再忙碌，都會趁着農曆新年請假「叉電」兼享天倫樂。「蛇仔」城城今年為本命年犯太歲，他透露將會依足傳統攝太歲，希望逢凶化吉：「基本嘢會去做，例如去太歲殿，拜吓太歲。」

繼續衝刺

即將踏入48歲的城城與女友熊黛林（Lynn）的愛情長跑已達七年，兩人更經常傳出婚訊，但屬工作狂的城城坦言在蛇年拒「蛇王」之餘，更唔做「蛇新郎」，他說：「犯唔犯（太歲）都冇咁快，但當然唔希望去到五十歲後啦，老實講有時係放低唔到自己嘅工作，仲有好多理想未完成，依家仲係一個好重要嘅衝刺期，加上我覺得自己電影事業先啱啱開始。」對於婚期無了期押後，問另一半可會投訴？他說：「兩個人一齊要理解體諒，如果對方都唔理解你的話，我諗佢都唔係一個將來去走下半生嘅人。」

Lynn多次高調「攻城」宣示主權，始終未正式有名分。

城城擊鼓姿勢英氣十足。

雖然Lynn多次高調「攻城」宣示「主權」，但城城多年來未肯給予對方正印名分，更暗示「城嫂」人選隨時有變：「無人知道將來會點，我覺得感情嘅嘢話唔埋，始終一日未結婚一日都會改變。工作擺第一，呢個性格我擺脫唔到，要我放低工作去享受一段轟轟烈烈嘅愛情？我做唔到。」

城城與讀者拜年，祝願大家財源廣進。

城城每年春節都做孝順仔，放假陪家人。

謝絕逼婚

他一直堅持先攻事業，再談婚論嫁的原則，更謝絕逼婚：「結婚係一個Complement（完整），要達成咗我理想再完成人生嘅下一步會比較好，呢個係我一直嘅計劃，有啲嘢我係唔逼得。我唔係一個急於早結婚早生仔嘅人，我大哥都未結，可能都係佢影響到我。」但他強調不會「唔結婚」：「又唔會唔結，成家立室都要有時間，我一日24小時唔夠用，如果一日48小時我OK！」

城城一直將兒女私情低調處理，皆因不希望將私人事成為別人茶餘飯後的笑柄：「我唔會多談我嘅感情世界，最唔鍾意就係一段感情開始或結束，會做咗笑柄、茶餘飯後嘅焦點。人點可能冇感情？之不過我一直都唔高談闊論，呢個係最基本保護，去維持一段想去珍惜嘅感情，所以我都係點到即止就算。（形容與Lynn的關係？）唔講啦，唔想講太多。」似乎Lynn仍要繼續默默做天王背後的小女人。

文：音樂組