張暖雅挺胸發火 搵人打舊愛

內地性感女星張暖雅（Angelina）近日言論與身材同樣出位，先與王晶女兒王子涵隔空罵戰，又被梁烈唯公然「拒愛」。原來Angelina正處於「內憂外患」。她自爆一直被舊愛大肆抹黑，被唱「四宗罪」：「之前男朋友真係好煩，喺到影響我工作生活，最近仲不停騷擾我，喺網上話我有愛滋病、以前做雞，仲話我整容、騙子，其實統統都係假！」她更勞氣地說：「話我有愛滋？睇吓我過幾年會唔會死？」

感受神力

對於被舊愛不停攻擊，Angelina一於有仇報仇，趁着年近歲晚，首次到鵝頸橋打小人，務求趕走衰氣！她先將舊愛名字寫在小人紙上，交給專業的「打手」拜神婆，她坦言過程中猶如神明上身：「婆婆喺我身邊不斷唸咒語，又用鞋將小人紙打爛晒，再用火燒紙碎。我真係感受到神力，全身都雞皮疙瘩。」問到是否希望前男友冇好下場？Angelina反而以德報怨：「始終都係有回憶，諗到個心都幾痛。我希望佢過得好啲，佢依家因為過得唔好先滋擾我生活、傷害我。」

張暖雅誠心上香，祈求趕走是非。

婆婆打小人時，張暖雅稱全身起雞皮，感受到神力。

經常與其他女藝人掀起罵戰的她亦寄望打走是非：「呢行競爭唔叫好大，開頭以為好複雜，但已比我想像中順利，我反而有時被人妒忌。（妒忌你身材好？）一定有啦，不招人妒是庸才，妒忌我先代表我成功，如果講都唔想講我先叫失敗。」

文：音樂組