無綫笑裏藏刀 明玩王維基
無綫與香港電視一直針鋒相對，就連邵氏賀歲片也不忘揶揄香港電視老闆王維基，指片中的「王危機」角色借錢開電視台後走數，逼令擔保人替其還債！片中雖未有指名道姓，但盡玩諧音，足令觀眾爆笑！導演鍾澍佳指該橋段只屬玩笑，香港電視發言人則預告王先生新年忙碌，應未能抽空捧場！
自香港電視申請發牌以來，無綫先後多次發聲撐公司無懼風浪，高層們亦不下數次與王維基隔空互寸，火藥味濃，連近日邵氏賀歲片《2013我愛ＨＫ恭囍發財》中，也有一場挖苦王維基戲份。劇情講述譚詠麟飾演的舊式茶樓老闆，為老友王危機做擔保，向銀行借了700萬搞電視台，沒料老友走佬逼令阿倫代為還債，阿倫苦無解決方法欲跳樓了斷。
導演：冇特別針對
雖然劇情未有指名道姓，但前晚的首映禮上，心水清的觀眾卻看得相當高興，成為該片爆笑位之一。對於無綫擺明「玩寸」，王維基昨透過發言人謂暫未有時間欣賞該片，故不會作出評論，更預告新年假期未必有時間捧場。該片導演鍾澍佳則透露該場戲份只是開玩笑：「條橋係即場撞出嚟，冇話特別針對王生。（無綫有冇施壓要咁做？）又冇。（怕唔怕王生嬲？）相信佢冇咁小器，嬲都嬲香港政府先，咁耐都唔發牌畀佢。」
志偉讚子珊交足貨
而曾志偉、葉玉卿、謝天華、鄭欣宜等前晚浩浩蕩蕩現身首映後派對，高層樂易玲及邵氏高層黃家禧亦有亮相，志偉直言觀眾反應冇得頂，還大讚片中子珊及欣宜演技出色，更大爆好友譚詠麟（阿倫）看黃宗澤向子珊的求婚戲時流下男兒淚。志偉笑指子珊即使拿不到影后，亦至少能獲提名：「我傳咗一段好長嘅message畀佢，睇到佢有進步，直頭可以入去識做戲嘅行列。（之前唔好？）有參差，依家識收放自如；欣宜如果可以放低身段，係可以做吳君如接班人；卿卿因為唔多戲，所以排第3囉！」卿卿對於排名不夠兩位後輩，亦大方認同：「子珊係搶戲，欣宜就搞笑。（依家戲癮大發？）係有，不過現實生活做唔到，老公唔畀！後日（即今日）返美國之後都未知幾時再嚟。」子珊對於獲讚一事笑不攏嘴說：「好多謝佢哋，會繼續努力！」
文：影視組