陳君宜蛇女犯太歲搬蛇竇
昨日是立春，正好踏入蛇年，肖蛇的陳君宜先跟各讀者拜個早年，問到今年蛇年犯太歲時，她坦言會依傳統到圓玄學院攝太歲，記者笑她可買樓或生B化解，她笑說：「生仔遲啲啦！等我老公ready先，因我哋都好忙，生仔係好嘥時間。」她稱反而會搬新屋，已計劃今年五、六月搬，現正物色dream house。
陳君宜稱年廿七會起程去日本滑雪：「去完滑雪返嚟都會派利是，派到年十五呀！不過我覺得喺香港拜年好悶，屋企都冇新年布置，連揮春都冇。（團年飯都有啩？）我年廿七就飛咗啦！」而談到新年大計，她稱會進攻大陸市場：「都係on line購物，會喺大陸搵office，首站應該上海或四川，因為要大量宣傳，所以投資都要八位數字。（經常飛咁忙，老公有冇詐型？）冇，因為佢都好忙。」
