陳慧珊買餸格價慳到盡
陳慧珊（Flora）老公鍾家鴻去年破產，家庭經濟遭逢巨變，幸好Flora與老公感情不變，日前Flora就與老公及囡囡一家三口出動，溫馨行街享受家庭樂，繼而買食物回家煮飯仔。為幫老公慳到盡，Flora不惜一再格價，買生果都一看再看，一於食到最划算。
曾經是無綫花旦之一的陳慧珊（Flora），其丈夫鍾家鴻去年破產，一家人於經濟上遭逢大改變，被迫大屋搬細屋之餘，更被拍到為慳交通費要帶囡囡逼港鐵。
揀生果逐個比
雖然生活上樣樣要慳到盡，幸好Flora一家人感情有增無減，日前Flora與丈夫帶囡囡去中環，以買餸當家庭樂。當日下午2時多，素顏戴cap帽的Flora，以一身平實打扮出現在超級市場，手持購物籃的她埋首揀生果，拿起一個個不同產地的水果逐一比較，仔細地格價後揀了個木瓜。
揀完生果，Flora再向海鮮檔進攻，見Flora在檔前左望右望，看了幾分鐘，最後買了條冰鮮魚，她揀了魚和水果後即前往付款，沒有再多行，以免亂花錢。
對女兒甚照顧
Flora離開超市時，老公和女兒已在外等候，只見兩父女穿上同款波鞋，一家三口結伴而行，兩公婆全程對女兒照顧周到，Flora拖實女兒，鍾家鴻從後搭住女兒膊頭。行了一會鍾家鴻再摸摸女兒額頭，相信是擔心她太熱，Flora見狀亦馬上幫女兒拉開外套的拉鏈，一家人沒有多餘節目，隨即乘升降機往停車場取車離開。
文、攝：追蹤組