趙式芝蛇年隱姓利是派雙封
富商趙世曾女兒趙式芝（Gigi）與「老婆」楊如芯（Sean）同性婚後依然甜蜜，前晚又拍拖出席音樂會，向來收單封利是的Gigi坦言不知婚後要派雙封，自爆「蝕」了多年。至於利是封印上會印甚麼字？Gigi說：「印恭喜發財或福字囉。」認真鬼馬！
Gigi與「老婆」Sean前晚拍拖出席音樂會，到場嘉賓還有邱達昌夫婦、蔡李惠莉、周國豐夫婦、李樂詩、郭秀雲等。
農曆新年將至，Gigi會否派利是？她說一向有派給員工，結婚後今年可會派雙封？Gigi說：「我唔知道原來結婚後要派雙封，以前結咗婚嘅長輩畀我都係一封，我一向都係收單封，咁我咪蝕晒？（利是封會印咩字？）恭喜發財或者福字囉。」可會帶Sean跟父母拜年？Gigi指父母習慣避年，還說笑：「如果你哋嚟同佢哋拜年，要自備利是封。」又說稍後會帶Sean跟父親吃飯，但要等趙世曾的明示或暗示。
加入大愛同盟
對於有關歧視同性戀條例，Gigi認為政府應多做實事，令大家對同志有認知：「有啲家長或上一輩，包括我父母，都擔心如子女係同志應點面對。社會應該要解釋同志唔係可怕嘅事，係唔會令人類滅亡嘅。」她已加入了何韻詩成立的「大愛同盟」，並非擔任幹事：「我只係支持嘅角色，如畀做幹事都唔會抗拒。」
郭秀雲唔買翅
郭秀雲則透露兒子龐錢景峰現於加州升學，指他已大個仔，好勤力讀書。近期她忙於推動環保工作，早前她看到北京有報道指很多海味店賣假魚翅，她呼籲勿吃魚翅，並笑言從來未試過出錢買魚翅，只是往飲宴才賞面吃。
而邱達昌女兒邱詠筠接手酒店集團總裁及執行董事一職後，旗下股價急升，獲爸爸勁讚及給女兒101分，邱詠筠工作繁忙，一個月飛足三個星期，馬來西亞有新酒店開幕，農曆新年她都會好忙。父母可有催促拍拖、結婚？邱詠筠表示未有這個打算，總之睇緣分。前晚她與前度男友同場，是否再見亦是朋友？她以要準備演講而避談舊愛。
文：名人組