張暖雅反擊：佢畀心機紅啲先
周秀娜與陳偉成（Avis）分手風波牽連甚廣，性感女星張暖雅直指Avis慘遭利用，矛頭指向「床照小三」Vivian（羅彩玲），想不到惹來Vivian好友王子涵（Ada）於微博內留言揶揄，張暖雅隨即反擊叫她畀心機增加知名度先。而Ada亦不甘示弱說：「佢咪使旨意喺我PR公司同爸爸（王晶）公司搵到嘢做。」罵戰一觸即發！
娜姐與Avis分手後，男方與Vivian的疑似「床照」流出成圈中熱門話題，張暖雅日前出席首映時揚言覺得有人利用Avis博上位，故戥對方可憐，想不到語畢即觸動與Vivian私交甚篤的Ada神經，隨即在自己微博內留言：「張小姐，唔關你事就收聲啦……你同你朋友盜用我個名出入早前嘅電影private after party博上位，我都未出聲！」雖未有指名道姓，但矛頭直指向張暖雅。至於王晶見到女兒留言，他亦回道：「呢條女周身水，任抽！」當記者致電王晶，他卻搞笑謂：「我唔知咩事，求其寫啫。」
「有其父必有其女」
張暖雅事後接獲記者電話，似乎怒氣未消，滔滔不絕搶着回應：「我公司同事講咗件事畀我聽，我覺得好好笑囉，我又唔識邊個Ada，依家知啦，原來有其父必有其女，王晶都經常鬧人。Ada話我博上位，咁佢都畀心機增加自己啲知名度先，佢做咗咁耐都冇乜人識。」她覺得今次Ada是想代好友Vivian出頭，這亦無可厚非，但香港人人有言論自由，自己捱罵實在無厘頭：「佢可以幫佢朋友，我都可以幫自己朋友。佢可以唔鍾意我，但大家言論自由，況且今次係記者訪問我嘅，我覺得唔啱梗要出聲啦。（佢話你用佢個名去電影after party喎。）我有首映飛，接着咪去party囉，我嗰晚都冇接受過訪問，點博上位呀？」
將她列入「黑名單」
Ada回應記者查詢，同樣勞氣非常，且直言張暖雅將被其負責的PR公司及父親王晶列入「黑名單」﹕「咪使旨意喺度搵到食囉。」她謂自己從來沒有指名道姓，如果對方沒有做過，何解要對號入座：「佢同佢個朋友去after party，全部都話係我朋友。我係冇知名度呀，我只不過係PR同學生，點解要紅呀？如果好似佢咁紅又成日畀人笑，死得啦。（佢話你幫Vivian？）我只係睇唔過眼啫，佢話人博上位，佢自己咪一樣咁做？」
文：影視組