古巨基掃4獎 分贈舊愛

早前事先張揚放大假缺席香港樂壇四個頒獎禮的古巨基，假期結束復工即第一時間到廣西南寧出席「音樂先鋒榜2013年度頒獎典禮」，基仔跟容祖兒同奪四個大獎，包括金曲、「最受歡迎先鋒男/女歌手五強」、「23家電台聯頒最佳專輯」及「全國最受歡迎男/女歌手」，除了祖兒、基仔，當晚同公司的Twins、鍾舒漫、林欣彤、泳兒、洪杰、馮允謙、王祖藍、林峯等都有獎，當晚英皇橫掃了廿一個獎成大贏家。

最緊要自己開心

而基仔領獎致辭時，特別多謝幾位前度女友，因為得獎大碟《告別我的戀人們》是昔日他與幾個舊愛的寫照，他笑說：「我冇正式喺台上多謝過佢哋，仲諗住將啲獎送畀佢哋，因為屬於佢哋，冇呢幾段情就冇呢隻碟。」他在台上可有多謝其得力助手Lorraine？基仔笑說：「又助手！」對關心妍宣布以後不再出席頒獎禮，他說：「其實選擇自己過得開心最重要。」

祖兒獲獎，多謝內地粉絲捧場。	鍾舒漫開心到南寧出席頒獎禮。	英皇在先鋒榜掃廿一個獎，眾歌手與獎座合照。

放長假外遊睇戲

昨日基仔已飛到廣州商演，他在電話中說：「放完大半個月假啦，其實前日喺香港已經復工，有個私人商演，跟住就飛咗去南寧。」基仔笑言農曆新年前會收爐再放幾日假，之後又要忙於工作，今年已經排得密麻麻。已多年沒有放長假的基仔說：「有番啲生活，成個聖誕檔期嘅電影我都睇晒。」他更去過韓國、台灣旅遊，問到他跟誰同行？基仔笑着避答：「又嚟？（得力助手有冇去？）又嚟啦！」他在台灣更探望昔日唱片公司同事及著名作家瓊瑤。

文：音樂組