周家蔚盼TJ 忠直孝義

周家蔚與洪天明的愛情結晶品「TJ」預產期在二月頭,但他們擇日在1月28日開刀分娩趕生龍仔,TJ更可能是名出世時重7磅的「巨龍」。周家蔚受訪談及懷孕感受,她指佗B時沒有孕婦不適情況,沒想過會如此輕鬆。從來父母都望子成龍,但周家蔚對兒子的期望卻簡單不過,只希望TJ做個忠直、孝義的好人。

BB隨時搶閘出世

由倒數BB出世100日,到依家就嚟生得,心情愈嚟愈緊張,好期待快啲見到個仔,原本擇咗喺1月28日開刀,但醫生話BB有機會早出世,因為天明仲喺大陸拍劇,所以心情有啲徬徨,就嚟生得其實應該行多啲,但係驚郁動太多,BB真係提早出世,所以呢排都逼自己瞓多啲,BB依家36周都6.3磅,到出世最少係7磅巨B。

呢排腦裏面出現好多畫面,好似關於BB嘅健康、或者諗起佢踢手踢腳。假如BB真係提早出世,都好想試吓自然分娩,身體復原得快啲,又可以喺蛇年追多個BB嘛,兩年生兩個都冇問題o架,哈哈。

呢排BB好活躍,成日喺肚裏面郁嚟郁去,似足老竇咁好動。不過,個仔都算好錫我,佗住BB咁耐都冇唔舒服嘅感覺、冇嘔奶、冇腰痠背痛,食得、瞓得,加上自己幾乎每日都出街,佗BB以嚟淨係試過連續兩日留喺屋企,每日都周圍去,所以時間過得好快,眨吓眼就已經生得,冇諗過佗BB係咁舒服,所以再生都冇問題。

天明體貼讚美

雖然冇乜孕婦唔舒服嘅反應,但都會唔適應,見住自己個肚愈嚟愈大,個樣愈嚟愈肥,相比以前好瘦、好靚都會唔開心,自信心都低咗,好似大肚期間拍咗兩個廣告,拍廣告嗰陣係完全冇自信,笑都笑得唔燦爛,惟有叫攝影師影靚啲、影瘦啲。天明都知道我有啲唔開心,所以成日讚我靚,佢都唔會話我肥咗,只係會用好親切嚟形容我個樣,都多謝天明一番心意。

雖然天明就嚟做老竇,但暫時唔覺佢有咩改變,可能佢要拍戲,經常唔喺我身邊,所以感覺唔係咁強烈,不過好多人話男人要見到BB出世先會真正有做老竇嘅感覺。我就經常影相畀佢睇等佢知道我嘅近況,唔想佢突然之間返嚟見到我個肚大咗咁多嚇親。

未見面 先旺父母

自己其實好少睇書,但佗BB之後都睇多咗,除咗睇好多孕婦書,每日都會講故事畀BB聽,希望培養BB對睇書嘅興趣,同埋開車都會聽音樂,臨瞓前亦會唱啲英文童謠畀佢聽,話可BB出世後心情平靜啲,唔會煩躁。其實對個仔嘅將來都冇乜太大要求,只係希望佢身體健康,唔使佢做到咩金融才俊,只係希望佢做一個忠直好人、孝順父母、識得孝義就夠喇。

挺巨肚搵生意

個仔可以話好旺我哋,有咗BB反而工作都多咗好多,我除咗拍廣告、做內衣生意、最近仲代理軍錶。其實我屋企同手錶好有淵源,由爺爺嗰代已經喺中環開舖賣錶,依家伯父、姑姐都係做手錶生意,唯獨我爸爸讀工程冇做,估唔到隔咗一代之後會同表弟Alan代理手錶,雖然多年嚟對手錶生意冇接觸,但係自己一向鍾意手錶,覺得好保值、好有紀念意義。

今次同表弟拍檔可以話係一文一武,由入貨、宣傳、Marketing都係一齊去做,同屋企人合作最好嘅係唔會出現問題,大家嘅性格亦都係好隨和,所以拍檔咁耐都有商有量,未試過爭拗。我主要負責Marketing,但係有時都會親自攞啲錶去見客,好似喺旺角見到啲舖頭啱賣我哋隻錶都膽粗粗走入去介紹隻錶,睇吓佢哋有冇興趣賣,佢哋見到個大肚婆入到嚟推銷手錶都嚇咗一跳,話使唔使咁博呀,做生意就係咁要親力親為。

佗B烏龍事:越位落車

我佗住BB期間有好多烏龍事,最初成日都唔記得自己大肚,好似去洗手間因為比較窄,成日都會撞到個肚,之後就會識得側身入去。有BB之後都一直有自己揸車,試過攞車嗰陣,發現隔籬部車泊得太貼,要由乘客位爬過司機位開車,諗番都唔知好嬲定好笑。

口述:周家蔚

筆錄:影視組

攝:謝國華