G.E.M.甄妮唔妥出面
樂壇「巨肺」甄妮早前直斥新一代「小巨肺」鄧紫棋（G.E.M.）對她目中無人冇禮貌後，前晚G.E.M.聲言已做好準備給前輩say hi，實質上兩人於後台近在咫尺卻互當透明，難怪甄妮繼續寸爆G.E.M.：「哦……佢有道歉咩？」
兩代「巨肺」甄妮和G.E.M.前晚出席十大中文金曲頒獎禮，竟未有把握機會「破冰」，相反兩人聲稱未有碰見對方，但據知甄妮在台邊等候出場時，G.E.M.當時身處十步之內，兩人竟視而不見互當透明。難怪甄妮在台上繼續說教暗寸G.E.M.：「做歌手有修養好重要，千祈唔好目中無人。」
「佢有道歉咩？」
甄妮接受訪問時，問到現場可見到G.E.M.？她即說：「冇呀。（G.E.M.請你去演唱會，會唔會畀面去睇？）時間啱，why not！」G.E.M.曾說透過微博向她道歉，甄妮即抵死寸爆：「哦……佢有道歉咩？（G.E.M.喺微博解釋當日見你同人傾緊偈唔敢打擾？）我哋平排一齊好長時間，我亦唔係做緊訪問，但過去呢啲其實好小事，唔明點解件事變到咁誇張，好意外。」
甄妮自言是想大家學習修養和相處，有修養、有歌藝先做到成功的藝人，是放銀紙入大家的袋：「我一句大話都冇講，我連佢中文名三個字都講唔出，唔需要去針對任何人，加上我有演唱會，唔想以為我博乜嘢，希望大家手下留情，幫吓我幫吓人。」
有準備打招呼
至於G.E.M.表示已做足心理準備，並有幻想及練習若見到甄妮會say hi、握手或是擁抱，但在後台始終與甄妮緣慳一面。對於甄妮踢爆當日G.E.M.有足夠時間和她打招呼？G.E.M.無奈說：「我印象中係冇呢個機會。（今次錯過同前輩冰釋前嫌機會？）都係隨緣，好有壓力呀！」
文：音樂組