頒獎禮Bad & Best 薛凱琪衰成熟
剛曲終人散的新城勁爆頒獎禮與叱咤樂壇流行榜頒獎典禮是香港樂壇盛事，眾男女歌手都悉心打扮卻有高低之分。就由星級形象指導郭慶彬（Ricky）解讀「Bad and the Best」！
薛凱琪
佢條裙太花，又着得佢好成熟，透視質料加上漸變色調，感覺有啲上輕下重，救唔到，好肉酸。
連詩雅
Volume裙款好有壓台感，但係佢個髮型出事，又手多多加條頸鏈，令成件造型太複雜，梳個簡單直髮已夠索！
鍾嘉欣
Bad taste到極，嘥晒佢靚樣同高挑身形，佢條裙紅得好娘，着到成個利是封咁，加上個髮型怪怪，成件事都唔match。
鍾舒漫
佢黝黑膚色着起灰黑調裙，着到佢冇乜精神，加上呢條水桶裙着到佢肥，如果簡單配條幼腰帶，就能凸顯腰線，更加順眼。
吳雨霏
Peplum設計係佢咁瘦身材先着得好睇，不過條裙略長，如果短幾吋，有拉長雙腿線條嘅錯覺交錯效果，完全修正佢身段比例。
容祖兒
Alexander McQueen披肩款裙嘅volume剪裁唔係個個着得好，因為易着得人好肥好大隻，但佢完全撐得起，卻襯錯彩藍色高跟鞋，如果襯番銀色或全白更靚！
G.E.M.
佢由頭醜到落腳，白色駁髮完全唔係呢個年代，嗰條吊帶閃片裙娘到震，無藥可救，完全令人眼睛受罪。
Profile
星級形象指導郭慶彬（Ricky）曾為李冰冰、吳君如，以及張惠妹等等擔任造型師，每季都出席米蘭、巴黎時裝周欣賞品牌時裝騷，包括Max Mara、Chanel、Valentino與Jean Paul Gaultier等，亦曾擔任中國時尚節目《美麗俏佳人》的嘉賓主持。