張家輝幹探魔警精神分裂

三大型男「探員」張家輝、劉青雲與古天樂前晚為寰宇新片《變役》在佐敦街頭取景，大批街坊圍觀，有市民不斷以手機拍照，工作人員要不厭其煩阻止，令拍攝進度稍為受阻。坐於車廂中的家輝手拿長鏡，拍攝一場偷拍目標戲份，有圍觀師奶離遠見狀與同行友人說：「咦，影帝張家輝喎！幾型仔，不過真人就瘦咗啲！」

5月後才動手術

一臉疲態的家輝甚少發言，只偶與導演陳木勝研究角色，原來近日他同時接拍林超賢新片《魔警》，因兩片角色不一，令其精神狀態到達極點，家輝說：「有十幾年冇試過同時疊戲，角色仲要落差大，呢部戲係正義警察，嗰部就要殺人放火，都真係搞到人格分裂呀！好辛苦，但冇辦法啦，咁啱個期撞到正，下次都盡可能唔好咁樣，頂唔住啦！（有市民話你瘦。）因為之前套戲要keep fit，但我唔想咁短時間谷番肥，咁唔健康，等體重慢慢回復正常囉。」

古天樂企喺牆角都型過人。

劉青雲未埋位都有戲！

早前家輝拍《魔》片傷及手指尾導致骨頭畸形，他無奈表示只能開刀做手術，惟手術後傷口要打石膏兩星期，故預計待5月完成兩片才能行動。

劇組前晚在佐敦街頭取景，吸引大批坊眾圍觀。

張家輝（右）與吳廷燁（左）同拍押送蒙頭犯人戲。

後悔畀老婆復出

早前本報拍得家輝揸260萬辣跑載7歲女兒Brittany到遊樂場玩耍，他笑指近日與太太關詠荷均忙於開工，故趁有空檔便當廿四孝父親陪女：「個女都詐型o架！話我哋成日都要做嘢，所以都有少少後悔畀太太返去TVB拍劇，不過都知道佢想過戲癮，又同好朋友歐陽震華一齊拍，應該幾好玩嘅！」

文：影視組