童菲拋胸濕誘 祖藍嗌吊癮
「晶女郎」童菲視李亞男如無物，眾目睽睽下濕身色誘王祖藍。身穿超短熱褲的菲菲俯身洗車盡展驕人身材，祖藍不避嫌讚她有內涵有外貌，以乎一拍即合。
明日「牛一」的祖藍獲送「大禮」，昨為新片《黑色喜劇》開工，被安排與濕身谷胸菲菲對戲，待遇恨死隔籬。劇情交代菲菲為討好扮演警察的祖藍，以性感打扮潛入警署幫手抹警車，期間遭水柱冷水照頭淋，菲菲由頭濕到落腳，可謂我見猶憐。導演錢國偉完全無憐香惜玉之心，菲菲至少試了20個take他才收貨，錢導每次叫cut，坐在車頭蓋的她也冷得牙關打震，但毫無怨言，勉強抹把臉又從頭再做一次，專業態度值得嘉許。繼「虐待」杜汶澤當街沖涼後，今次又在菲菲身上「重施故技」，記者打趣叫錢導「禽獸導演」，他得戚答：「冇辦法啦，呢啲事平日唔會發生喺自己身上，咪惟有叫啲演員演囉。」
滿臉唇印賀牛一
菲菲拍竣這場戲後攬毛巾接受記者訪問，直言未有想過自己的性感底線：「其實性感也可以很高貴，只要不是低格，應該可以接受。（有為男友做過類似傻事嗎？）我來了香港發展兩年，知道自己要甚麼，戀愛4、50歲也可以談，但拍電影不可以。」果然目標清晰，難怪深得王晶痛愛。
祖藍在旁「觀戰」，對於被指艷福無邊，他笑謂：「但每次都未埋到牙，可能大家唔想睇我嘅情慾戲啦。（覺得菲菲點？）呢個女仔好專業，take up得好快，佢拍埋套戲就要準備學士畢業論文，一口流利英語好厲害囉。」
而日前祖藍開工，獲其他拍檔包括古明華、江欣燕及o靚模文凱玲等為他預祝生日，舉行簡單的睡衣派對，祖藍更被發現滿臉唇印，錢導則上載當晚照片到自己微博內公諸同好，相信祖藍這個生日應該開心不已。
文：影視組