余少寶渣都冇：想自殺!

人生不如意事總是十常八九，但余少寶去年接二連三跌入人生低谷。日前她出席活動時被發現與亦師亦友的老前輩秦沛哭訴心聲，當時秦沛還指余少寶是為去年十月初上水寓所遭爆竊、被盜去結婚證書及戒指等總值520萬元財物而傷心，原來她的眼淚不只為財物而流！據知，少寶兩年前耗盡畢生積蓄到廣西買樓，卻遇上世紀騙局以致渣都冇，之後更斬情絲與人前恩愛的老公關兆輝結束八年情。少寶昨日接受本報訪問時，娓娓道出過去一年三樁連環慘事！

關兆輝有挽留

其實少寶自出娘胎生活無憂，自法國學成回港後便參選港姐，並奪得季軍，之後更下嫁香港車神關兆昌胞兄關兆輝，過着少奶奶生活，但她表示結婚兩年後開始覺得與關兆輝性格不合，但不忍讓家人擔心，故一直啞忍。她忍着淚光說：「結婚頭兩年就開始覺得溝通有問題，個感覺愈來愈淡，大家都冇乜溝通，真係好辛苦！」少寶原本希望忍下去維持這段貌合神離的關係，但因為得家人支持，所以才作分開決定：「家人知道我哋嘅事後，覺得我唔做少奶奶都可以好開心，我都掙扎咗好耐！舊年發生咗好多嘢，加埋加埋都唔順利，我為此失眠過好多晚，亦曾諗過自殺，但諗過咁做好自私，因為屋企人都好錫我，知道自己更加要企起身面對！」

當年余少寶參選時樣子甜美，表現淡定。

日前余少寶出席慈善高爾夫球賽突然痛哭，當時她未有承認離婚。

據知，少寶遇上世紀騙局時已醞釀搞分居，如今已搬出上邁爾豪園獨立屋，與家人同住。她說：「如果我冇同佢分開，外界嘅人都以為我過少奶奶生活，但我同佢分開唔係為錢，同時亦唔存在第三者，但真係冇解決嘅方法，所以立下決心分開！」問到關兆輝有沒有挽留？她斬釘截鐵說：「有試過，但我唔想返轉頭，站起行呢一步的確唔容易，前路可能一片漆黑或一片光明。係，我依家乜都冇，但我都唔後悔，因為要向前望！」

未離婚前，余少寶開舖頭，又經常歐遊，閒時更打高爾夫球打發時間。	放大圖片	放大圖片

堅持自力更生

如今冇人冇物的少寶為展開人生新一頁，現已積極安排日後的生活。她說：「已經開始鋪排，之前我喺外國讀書十年，應該會選擇喺外國搵工。香港太大壓力，所以已開始留意外國嘅行情同經濟情況。」她續說：「之前可能會有好多人羨慕我，但依家要自力更生。我好知足，唔係為錢，清茶淡飯已OK，最緊要健康。我知自己有屋企人錫，唔想令自己抑鬱，人會有喜有悲，最緊要係識企起身。」

少寶表示辦離婚一事連朋友都蒙在鼓裏，只有家人知道原委，早前更着她到歐洲旅行散心：「去咗兩個幾月，以為可以放低，但係返到嚟，一提呢件事就忍唔住喊，傷口係需要時間愈合。」她更借爆竊一事自嘲：「唉！依家結婚證書同戒指都冇晒，可能係個天話我知要從頭開始！」

港姐季軍星途平平

現年四十歲的余少寶是一九九三年香港小姐季軍，與莫可欣和郭可盈同屆。入行後星運一般，曾主持休閒節目《都市閒情》。至一九九九年她到英國修讀法律。之後與拍拖三個月、曾志偉的好友關兆輝在美國閃婚，至去年於元朗投資六位數字開甜品舖做老闆娘。

文：專案組