尼古恩訪港歎啤冧食客
二十五歲的德國體操「男神」尼古恩（Marcel Nguyen）憑靚仔的外形秒殺香港女粉絲，日前他首度來港出席活動，即被大批女粉絲包圍，訪港活動忙不停，直至夜晚才可以享受私人時間，ontv追蹤部隊即拍得「男神」與經理人趁Happy Hour到餐廳鬆一鬆，他特意選中近窗的位置，方便觀賞香港街外夜景，又睇餐牌揀啤酒，酒量了得的他更舉杯大啖大啖飲，期間尼古恩又不時行來行去及伸展筋骨，更不斷玩電話，莫非掛住同女友用短訊聯絡？
而由於「男神」俊俏外形非常易認，餐廳內有不少食客紛紛上前要求合照，為人友善的尼古恩當然全部應承，合照時使出招牌電眼，加埋無敵笑容，可謂無得彈，及後他與經理人坐的士離開。