孟瑤鹹淡廣東話有排拮
內地女星孟瑤日前來港拍攝賀歲片，在戲中她因講廣東話「唔正」而鬧出不少笑話，原來她在戲中飾演點心妹，被問到有乜嘢賣時，她把「有排骨」說成「有排拮」，令在場演員聽見後都笑爆嘴！
孟瑤自從2010年為內地富二代周磊誕下一子後，便「升格」為幸福少奶奶！不過熱愛演戲的她早前卻回港過戲癮，在賀歲片《我愛HK2013恭喜發財》中飾演七十年代由內地偷渡來港的點心妹，孟瑤說：「其實上年拍賀歲片已經好開心，不過今年唔單止對白多咗，就連瞓覺嘅時間都多咗，所以更加開心！」
片場眾人開心果
因孟瑤的廣東話講得不正，故她在片場中不時鬧出笑話，成為眾人的開心果，她說：「我喺戲入面係賣點心，當被問到有咩嘢賣時，我將『有排骨』講成『有排拮』，完全係變咗另一樣嘢！因為日日拍戲都通宵，當大家都好眼瞓時，佢哋就會話：『孟瑤你過嚟，快啲講啲廣東話畀我笑吓！』跟住大家都會笑爆嘴！」
讚陳爽老公浪漫
提到早前陳爽結婚她做姊妹，她說是還債，因自己結婚時對方亦做過姊妹，又說：「去三亞睇住爽爽出嫁，我真係感動到喊！因為佢老公好浪漫，講愛的宣言時搞到班姊妹都周圍問人有冇紙巾！」問孟瑤有沒有教陳爽「人妻攻略」，她笑說：「爽爽已經係一個好大方、好有氣質嘅女仔，哈哈！不過無論係男女朋友、兩公婆又好，二人相處唔好咁計較，唔好因為一啲小事而嗌交，因為好傷感情。」 文：專案組
攝影：黎志輝
場地：Zip Cafe