張啟樂拒跳江南舞惹禍
首批被炒的亞視藝人日前大爆亞視尚未出人工，早前連取「大信封」都被拒門外的陳綺雯，昨日透過電話訪問表示公司已聯絡他們取支票：「會約埋四個人一齊返去拎，團結就是力量，已經同亞視傾好會畀我入去！」她又表示不會向舊公司作出追究：「公司話我哋違約唔會有更多賠償，雖然我問過律師係有爭論空間，但我唔想再搞大件事。」問到與亞視日後可會有合作空間？她就寸嘴說：「大家理念唔同，未必合作到住。」
而同是天涯淪落人的張啟樂在昨日的電台錄音節目再談被炒經過：「21號冬至嗰日WhatsApp我哋下午1點臨時要加堂，我12點先睇到個message冇去到。跟住下午5點就收到電話要炒我，我話一早同公司講咗有嘢做去唔到，對方話王生唔接受呢個理由。」不過亞視高層葉家寶昨日表示未收過其請假信，才會作出解僱決定。
主持工作被抽
張啟樂再爆早前11月收到通知要全體員工到政府總部跳《江南style》:「公司話以娛樂性質舉行，全體員工務必出席，唔去要畀足夠理由。但我作為Artist唔想涉足政治所以冇去，之後我冇收到警告，但係我個節目《微播天下》同一個頒獎禮嘅主持工作被抽起咗。」最後他更寸爆指自王征入主亞視後，員工士氣低落，節目亦毫不吸引。
文：音樂組