謝安琪捍衞樂壇 寸賽果易估
近日不少歌手掀起口誅筆伐，紛紛聲討頒獎禮不公，一早預料會食白果的謝安琪雖然無意加入戰團，但不忘暗寸某些賽果「好易估」，並寄望樂壇能夠回到「四大天王」高峰時期，百花齊放！
謝安琪（Kay）、鄭欣宜、許廷鏗等歌手日前出席活動，未能與老公張繼聰歡度除夕佳節的Kay說：「佢喺廣州做緊嘢，我都未同囝囝倒數過，佢次次未到12點就瞓咗！」談及新年願望，她大講金句祝願香港：「多啲包容，多啲笑容！」問到可會追生「蛇B」？她笑言：「冇呢個打算，不過碟就會出兩隻！」
着重氣氛
對於近日許多歌手怒插頒獎禮不公平而發起杯葛行動，上年冇出碟的Kay仍身體力行支持樂壇，盡量出席頒獎禮，她說：「依家樂壇有好多台，亦好多風格，但我最想返到『四大天王』年代，因為當時頒獎禮氣氛好好，依家有個別賽果好易估到！」提到後輩鄧紫棋（G.E.M.）拍片向叱咤示威，Kay力撐對方說：「佢係一個叻女仔，唔覺得佢輸打贏要，樂壇需要唔同嘅聲音！」
欣宜失守
同場的欣宜在台上獻唱時，因Leggings太鬆而頻頻整理，當與許廷鏗以大動作擺可愛甫士後，最終不幸「失守」，下體疑似現形。被指「翻脹」的她指肥得是福，並自爆打保齡及玩跳舞機減肥：「瘦身但想Keep住個胸同Pat Pat要堅挺！」
文：音樂組
攝：黎志輝