樂瞳：佢係長期飯票
無綫小花樂瞳最近在新劇中再演任性少女，自然駕輕就熟，但原來外表開朗的她最近接連經歷親人離世，大受打擊的樂瞳仍保持積極心態，視之為寶貴人生經歷，寄望明年會更好。
樂瞳最近在劇集《幸福摩天輪》中終告別學生妹，飾演尋人服務機構職員，戲份不少，她笑言拍攝過程非常開心，與主要對手鍾嘉欣、陳智燊（Jason）、蔣志光及陳偉洪等感情如一家人，幾乎每日嗌餸食飯，真的像返office工一樣，她更大讚Jason細心，經常慷慨解囊：「佢買好多零食畀大家，之後覺得太熱氣，又買生果，仲批埋切埋，更加係『長期飯票』請大家食飯，好人到爆，劇內劇外都係師兄！」
任性被肯定
提到今次角色「洗潔精」個性活潑又任性，經常跟同事鬥嘴，樂瞳演得入型入格，獲得不少稱讚，但她笑言現實的她隨着年紀漸長愈來愈文靜，問到會否覺得跟前幾套劇集相似？她亦擔心定型，但暫時先做好本分：「每次都係機會，佢哋覺得我勝任呢類角色，都係一種肯定！」她透露最近忙於拍攝新劇《師父．明白了》，戲路完全不同，挑戰甚大：「古裝劇又要打交，最後仲殉情自殺，好多感情戲都幾難處理。」
接連失至親
經常保持甜笑的樂瞳，原來最近經歷人生低潮，嫲嫲及婆婆於一個月內相繼過身，對她打擊甚大，難得她依然專業地繼續工作，並視之為成長的經歷，會積極面對：「呢段時間情緒係亂咗，要時間調節，但都令我更成長。」問到新一年願望，她希望家人身體健康，可繼續拍劇及再次攻樂壇，會否想拍拖？樂瞳說：「都想，希望唔開心時有人安慰吓，不過呢排冇時間識人而且冇乜心情。」
文：立影
服裝：bread n butter