黎耀祥慰勞宴送現金
「三屆視帝」黎耀祥前晚筵開11席，宴請一眾台前幕後工作人員，包括《大太監》演員梁烈唯、陳國邦、蕭正楠、胡定欣、曹永廉及監製李添勝等。去年尾贏得台慶百萬大獎及視帝寶座，祥仔笑言太多名目，故要請食飯感謝一眾幕後，問到是否因近期豬籠入水？他說：「賺幾多都要請，但唔擔心，有TVB贊助，我今晚會拎部分台慶大獎出嚟同大家抽。（有現金獎？）睇下大家夠唔夠，唔夠咪拎啲，好彩今日袋得錢少。」
有指他擺風水陣剋林峯，祥仔即冇好氣指報道失實：「我從來唔擺呢啲嘢，最好笑講我剋住個山峰，如果第時係馬國明，咁我咪要剋住個馬鞍山？陳豪仲大鑊，要剋埋流浮山，個陣咪要擺唔停？」但他坦言會看基本風水，如健康及流年。
