岑麗香戒甜操肌怕變肥虎
「宅男女神」岑麗香、鍾嘉欣、朱晨麗及蘇永康等前晚齊倒數，香香和朱晨麗分別以低胸、露肩裙亮相，吸引大批粉絲撐場。香香透露為新劇苦練肌肉做飛虎，朱晨麗則大讚緋聞男友馬國明nice，但自言要專心工作。「工作狂」鍾嘉欣希望今年能學識平衡私人生活。
岑麗香（香香）、藝人鍾嘉欣、「Morning朱」朱晨麗及蘇永康，前晚聯同馬來西亞歌手葉俊亨、「巨聲幫」成員吳業坤和馮允謙等出席《Landmark North上水廣場「星光閃耀迎2013」》活動，眾人與新鴻基地產代理有限公司高級租務經理廖慧慈及上水廣場物業及設施經理談國雄在台上拉炮倒數，場面熱鬧。席間，香香和朱晨麗以一襲露肩長裙行騷兼大玩遊戲，但穿低胸裙的香香顯得有點不自在，事後她表示有做足安全措施，但笑言早前往加拿大食了不少，香香希望新一年能少吃甜品，並謂正拍劇飾演飛虎隊員：「依家要fit啲、練muscle，所以每日都逼自己跑步。（怕同茍芸慧嘅飛虎比較？）冇諗比較，我哋角色唔同。」
朱晨麗忘掉辛酸
談到與陳展鵬為新劇拍爆破場面，獲對方抱抱營救的鍾嘉欣直言有點害怕：「我驚我重，但展鵬畀到安全感，所以好放心。佢話我得90磅，輕過啲替身，但啲替身全部都係男人。（拍前問過緋聞男友伍允龍？）冇，最近拍劇好攰。」自言是工作狂的她希望今年能學識平衡私人生活及工作。
至於朱晨麗與馬國明的緋聞前晚被主持拿來開玩笑，朱晨麗笑言早已習慣：「同事成日笑我『Morning朱，馬明唔喺度嘅？』，有個新花名好開心。（有發展機會？）冇，係朋友，佢好好人、好細心，有緣份就睇吓第時有冇機會。」提到其新年願望是忘記過去辛酸與不快，她說：「希望將來靠自己賺錢養自己。（可以搵人養。）咁早？我仲細，呢啲嘢可遇不可求。」
同場的台灣藝人大牙及Apple均以性感短褲露腰裝現身，二人分別大跳火辣熱舞，前者不斷上下自摸，後者擘髀露黑底，令現場氣溫勁升！至於蘇永康則表示支持梁漢文發聲明，並相信他與曾志偉的交情不會出賣對方。
文：影視組