猷君女友索爆 賭王Pass!
賭王何鴻燊四房兒子何猷君日前被《好報》獨家拍得與女友Francesca煙韌拍拖，當日猷君只身穿波衫拖鞋，期間又掛住玩電話，Francesca只好施展冧功又翹又拖男友，令猷君最後乖乖攬住女友專心行街。事後猷君接受本報訪問，坦承與女友感情穩定，並透露爹哋亦很喜歡Francesca，全因女友夠靚女！
何鴻燊與四太梁安琪的兒子何猷君，跟西班牙籍女友Francesca拍拖約一年，但感情一日千里，二人近日更趁住聖誕及新年假期齊齊回港度佳節，日前還被《好報》獨家拍得他們煙韌行街街。事後猷君接受本報電話訪問，坦言不知道被偷拍：「大家影到我已經好好彩，我要準備考試好少出街。（你着住波衫？）哈哈，我成日都着波衫。」
直認二人感情穩定
由於兩小口子當日表現恩愛，問二人感情是否很穩定？他不諱言：「係。（聖誕節點慶祝？）冇呀，都係忙溫書，我都係同屋企人食餐飯，佢（女友）自己都要同屋企人過，咁佢都未夠18歲，大家要各自陪屋企人。」至於除夕夜，猷君笑言都要溫書，還未安排其他節目。問到爹哋是否很喜歡Francesca？猷君即忍不住甜絲絲笑說：「鍾意，佢唔會反對，呢個係我choice嘛，加上爹哋鍾意外國人。（覺得Francesca夠靚女？）哈哈，呢個係其中一個原因。」
考好大學好過收樓
而下月是他18歲生日，向來出手闊綽的賭王就試過送樓給三房子女超蓮和猷啟作為成年生日禮物，問猷君知否爸爸將送甚麼給他？猷君表示：「我讀書讀到連生日都要人提，不嬲唔太重視呢樣嘢，亦都唔會大搞，加上嗰段時間撞正考試。」向來親民的猷君更直言：「爹哋如果送幾千萬樓畀我，仲得人驚，唔好講笑，香港冇乜人生日會收層樓。（但賭王試過送樓畀超蓮？）家姐嘅嘢我就唔知啦，我直情冇同爹哋媽咪講過我想要乜。」曾被賭王稱讚是數學天才的猷君還乖巧地表示：「我生日願望係考到間好大學，到時先再慶祝生日。」
文：名人組