古巨基被爆唔妥新城

基仔日前揚言明年1月1日開始放大假，並稱新城頒獎禮舉行當日要工作，故不會出席所有頒獎禮，但頒獎禮前一晚（26日），他仍抽空買飛睇戲。其實基仔近年與新城的關係愈趨惡劣，前日他更於網上高調晒戲飛。而新城音樂、娛樂及製作總經理朱明銳前晚於慶功宴上大爆基仔不喜歡出席新城頒獎禮，他指頒獎禮猶如派對，不出席不應有「禮物」，並非針對任何人。

朱明銳：好多人出席

朱明銳說：「覺得唔舒服唔想出席，都仲有好多人出席。黃偉文同內地歌手岳薇喺外地有事嚟唔到，都諗過係咪應該取消佢哋嘅獎項，但佢哋唔係唔想嚟，而係嚟唔到，唔應該執着喺唔到冇獎上，而係喜唔喜歡呢個頒獎禮，佢一個月前已決定唔嚟。」他坦言往後亦會繼續唔出席冇獎機制。

朱明銳	陳奕迅不信古巨基遭電台打壓。

基仔的勁敵陳奕迅（Eason）表示會尊重基仔不出席頒獎禮的決定，他自己亦說了多年不想出席頒獎禮。問到是否公司不尊重其意見？他笑說：「我係阿崩隻狗，愈叫愈走。公司叫我唔好去我就要去，求我去就可能唔去。（有傳基仔遭叱咤打壓？）應該唔關事，英皇都回應咗係傳聞。」

陳奕迅撐基仔有好歌

Eason又稱喜歡基仔今年的作品：「就算唔出席，有好歌都會留意到，冇問題，我幫佢講。」對於好友梁漢文發聲明捍衞人格，Eason道：「有啲嘢唔需要再講，因為唔識點應付，要引用番吳君如嗰度（指抽水論），係助長件事發展，千祈唔好變慈善伶王連續劇。」而林峯表示剛得知基仔不出席頒獎禮，亦感可惜。提到有指他因奪不到視帝而不續約無綫及罷拍劇，他指合約未到期，而無綫亦早已為他接明年的工作，清楚每個頒獎禮都有其規則，有信心成《勁歌》頒獎禮大贏家。

另外，有指基仔亦被叱咤打壓，但其《戀無可戀》與Eason、羅力威等入選「叱咤我最喜愛歌曲」最後五強。

文：音樂組