徐子珊大殺三方 林峯聖誕冇得抖

失落無綫台慶頒獎禮「視帝」、「視后」大獎的林峯和徐子珊，在今日聖誕節各有各精彩。剛完成賀歲片拍攝，兼由年頭忙到年尾的子珊，難得有假期，可以與親友聖誕開派對盡歡，到明日才再投入工作，將會飛往北京開工，順便度過另一番風情的白色聖誕。子珊笑言最難忘的聖誕節，是小時候親友教她玩啤牌「鋤大D」，「鋤大D」有一手的子珊自小大殺三方。

買大屋獎勵自己

子珊雖然失落「視后」，但密密接Job，實在是豐收一年，問到她想買甚麼聖誕禮物獎勵自己？子珊說：「一路都想同屋企人住，其實最想買一間大屋，可以成家人一齊住，依家努力儲緊首期。」子珊失掉獎項，但比起楊怡卻更贏得民心，問子珊是否覺得比獎項還重要？她說：「喺台上講嘅一番話，係自己心底嘅感受，知道有咁多同事錫，覺得好窩心，自己得到嘅係好多。」子珊與林峯關係如同「哎吔兄妹」，可會戥林峯失落「視帝」唔抵？她說：「當然失望，阿峯係三棲藝人，佢三方面都處理得好好。」

徐子珊終於有假放，與親友開Ｐ慶祝。

徐子珊與林峯互相鼓勵，如同「哎吔兄妹」。

操肌迎接演唱會

至於林峯則要在聖誕節往內地趕拍劇集，未能與家人歡度聖誕，而將會舉行演唱會的他，除了拍劇外，也要為演唱會錄歌及練體能，這個佳節實在過得非常充實。

子珊大讚林峯多棲藝人瓣瓣掂。

林峯還要趕劇，在工作中度過聖誕節。

採訪：影視組

髮型：Maggie Law＠Kim Robinson