亞視保安監場 辣慶藝員

亞視昨日不理平安夜佳節流流，繼續要旗下藝員朝十晚三返亞視大埔總台接受再教育，但已「從善如流」由一周返足五日，改成每周只返一、三、五，下午班更「王」恩浩蕩，由13:30至15:30，讓藝人有個半鐘食飯。

姚嘉雯素顏驚嚇

有備而戰的亞視，命令大閘保安不准記者進入亞視範圍，只能在大閘外採訪。昨早雖寒風刺骨，但一班「乖」學生：林紫君、張家瑩、周嘉莉、亢帥克、李建龍、蔡國威、筱靖，十時前已乖乖返到，除筱靖外，不少女藝人為趕返學，不惜素顏示人，眼耳口鼻未執齊的姚嘉雯僅僅趕到，遮面避傳媒，已「飛的」的馮家俊，十時十分才到達。

亢帥克飛的返亞視，事後竟將上課「機密」上載微博。

亞視昨日派保安看守，嚴拒傳媒入內採訪。

林紫君與李建龍面對記者，被問是否怕被炒，林紫君看破世情說：「唔驚，要死就死o架喇！」剛趕到的蔡國威說：「我仲有十分鐘就遲到，唔遲得o架！（對亞視灰心？）我對亞視不嬲唔灰心！」張家瑩說：「王征鬧人我都喺度。（聲帶外洩要追究？）我唔在場，王生當時當傾偈。（係咪洗腦堂？）咁大個人讀過書，唔會好似小朋友咁。教學內容係啲問答環節，社會上知識咁，例如：邊屆港督做得好。」

張家瑩撐未有因上堂而被洗腦。	筱靖怕遲到，雞咁腳飛奔返亞視。	周嘉莉則飛的匆匆趕到。

亢帥克洩密博炒

眾藝人昨日起進入亞視大樓前，一律要在感應器上拍卡簽到。上堂時又要交出手提電話，但遭藝人們反對，最終變成手機放枱面，由保安嚴密監視，不許拍片、錄音，若有內容外洩，全體上堂藝人一併追究。上堂更有兩部攝影機一前一後拍攝上堂情況。

亞視又出新招，要藝員上堂前交低電話和打工卡，更安排保安在課室侍候。（設計圖片／對白）

（設計圖片／對白）

中午十二時，上午班落堂放午飯，姚嘉雯乘的士外出，她說：「上晝鄺凱迎（亞視高級副總裁）教營運同亞視係點樣走過來。（係咪要交出手機？）放晒喺枱面。我仲有五個月滿約，未傾續約，會同葉家寶傾。（王征會突擊督學？）冇錯，我覺得佢應該聽藝員反映，有時傳到去佢度，中間已經出咗好多誤解。」而犯禁放相的亢帥克昨在電話說：「唔係博炒，上堂有叫熄電話，如果覺得我洩露機密，應該有人搵我。（有攝影機影住上堂？）係，有少少緊張，打呵欠都匿埋，又唔敢撩鼻屎。」

禁堂上拍片錄音

亞視高層葉家寶對於藝人要求車馬費及計騷錢，他說：「公司只會考慮畀前一晚開夜藝人第日返晏啲，其他嘢唔會考慮。（點解要打卡？）唔係唔信藝人，係想公平處理，有證有據，藝人紀律好重要，必須執行！（交出電話又點解？）想藝員專心上堂。（搵保安監視，怕聲帶流出？）公司唔想再有內部培訓內容外洩、被斷章取義，今日起嚴禁拍片錄音，由保安負責監察。（亞視聲明歡迎旁聽？）課程會選擇性公開，今日講內部家事，未方便旁聽，遲吓高志森、黃桂林做導師，可以考慮安排旁聽。」對於原本應返學的甄詠珊及蒲進缺席，葉家寶稱正了解中。

有亞視藝人抱怨亞視大細超，亞姐馮雪冰、王家敏不用上堂，據悉兩人合約條款沒有上訓練課條款，亞視曾叫二人加簽但遭拒絕，故亞視未能將二人炒魷祭旗。亞視昨在節目《微播天下》播出上堂情況，試圖增加透明度。此外，「星光幫」于天龍在微博留言：「我在今個月初約滿亞視，好感恩！」弦外之音似慶祝甩難，順道替被炒女友陳綺雯出口氣。

文：影視組