周汶錡愁送禮 望一擊即中
周汶錡（Kathy）與Julien Lepeu結婚後，榮升靚太的她將與夫共度婚後首個聖誕節，百忙中Kathy抽空到中環Valentino店選購聖誕舞衣，但最頭痛是送禮物，「無飯」主婦的她會下廚煮火雞冧老公，不過若一擊即中，相信會是最佳禮物！
Kathy會與老公Julien齊齊留港過聖誕：「結婚後感覺有啲唔同，今年會特別開心，我哋唔會二人世界撐枱腳，呢啲大時大節，梗係要同一大班朋友慶祝，到時會交換禮物應吓節。（唔使陪老爺奶奶？）佢哋早已安排節目。」
入廚整火雞
為求應節Kathy會親自下廚弄火雞，二人可是「無飯」夫婦？她立刻澄清，更大讚老公廚藝了得：「我哋平時都會玩煮飯仔，佢廚藝叻過我，無論煮西餐或中餐最重要係心機，我冇老公咁有心機，但有心思。佢成日都話用料新鮮就會好好味，始終香港唔似法國，可以喺農場摘完新鮮蔬菜就即煮！」
預備了甚麼聖誕禮物給老公？Kathy大傷腦筋，打趣地說：「都唔知買乜！買女仔嘢就易，男人真係好難諗送乜，何況佢乜都有，開開心心食一餐就算，好過收禮物啦！」及後她透露會回法國過年，是否刻意避年？Kathy如夢初醒地說：「係喎！我結咗婚要派利是，我真係冇諗過避年，只係覺得新年假期多，可以留耐啲喺法國滑雪。（努力造人，下年聖誕與新年可以三人行？）得啦，我會努力！」若然「一擊即中」造人成功，相信已是送給老公的最佳禮物。
文：名人組