杜汶澤出賣君如：奄尖乞人憎
爆笑演員杜汶澤寧放棄接拍兩部電影，寧願少賺七位數字片酬，甘願賣友賣妻，踏足舞台演搞笑《咔啦騷》。阿澤事先張揚會大爆身邊好友情史秘史，未開騷時，已先爆他做酒店侍應時遇未走紅吳君如，帶她去廁所時，覺得君如又肥又乞人憎。
素來敢言的杜汶澤於2月22至24日在會展初演爆笑《咔啦騷》，將大爆身邊朋友，如鄭中基、吳君如的情史秘史，甚至連老婆田蕊妮都照爆，爆佢點樣趕走晒佢身邊啲女仔。阿澤更事先張揚表示，好友如怕被爆料，可買飛來捧場，歡迎好友上台責打。
問到阿澤為何有興趣演戙篤笑？他說：「《咔啦騷》其實係楊生叫我個名，公司話我既然成日攞朋友嚟玩，不如撈番筆，公司叫到，乜都話好，幾驚佢哋叫我去英皇駿景酒店出席飯局唱K，到時我真係要洗定八月十五……。（玩朋友賺錢豈不是賣友求榮？）朋友同觀眾之間，我梗係揀觀眾啦，朋友可以識過嘛。（公司都玩？）傳嘅嘢有幾多係真？要睇爆料嘢，梗係要買本《爭氣》嚟睇，就係傳言唔係真至可以玩。」
插蔗寓當借
記者會上，出現不同服裝女郎，阿澤說是代表他人生不同階段，而他褲頭插蔗的造型，是說他昔日嗜賭，經常賣、當、借度日，至於侍女服裝代表他做酒店侍應時，遇到吳君如與一位與阿澤同姓的靚仔藝人來撐枱腳，阿澤說：「我仲帶過佢去廁所，嗰時個吳君如，仲好肥，又奄尖，估唔到佢仲好乞人憎。」文：影視組