張繼聰唱歌講heart唔mind走音
張繼聰跟太太謝安琪同年出道，同屆還有很多實力派歌手，阿聰認為唱歌很難界定唱得好定「渣」，即使有一流的唱歌技術，也要用心去唱，否則難以感動人，他好享受在舞台上的演出，每次都希望做到最好。
童星出身的張繼聰進身樂壇當年，同屆歌手有他太太謝安琪、王菀之、方大同、側田、衞蘭等，被讚賞為唱得的實力派歌手，阿聰說：「佢哋由細玩音樂玩到大，我好榮幸同佢哋同一屆出道，全部都係創作歌手，『敲』張枱王菀之就知咩音，真係好勁，我哋嗰屆好癲，大家成班好好朋友，見到佢哋都發展得好好。」
阿聰認為唱歌難以界定邊個唱得勁、唱得好，他說：「音樂唔係奧運會，係咪唱歌嗌得高音啲，最普通觀眾聽得出就好，其實音樂仲有好多層次，技術有好多層面，唱歌冇話邊個勁啲渣啲。」他曾擔任過不少歌唱比賽評判，聽到有些參加者技巧好好，他說：「但我真係聽唔到佢個心，究竟佢唱緊乜，或者聽到另一個張學友、另一個陳奕迅，但有啲人技巧唔好，但打從心底鍾意唱歌，我反而會感動。」原來他每次上台唱歌從不會在乎走音與否：「如果次次都同自己講唔好走音，咁不如叫佢哋聽CD，CD一定冇走音。」
享受台上演出
細細個就演戲的張繼聰，對演員身份比較志在，演戲給他舒服感覺，參演過很多舞台劇的他說：「我好享受喺台上演出，我唔係藝術家，藝術家好高級，我係藝術工作者，呢刻好平衡到心態，我唔會自卑，我又唔會自大，知自己做緊啲乜，知自己做到啲乜，咩係做唔到，對拍劇、主持、DJ，對唔同觀眾需要唔同語言去表達自己，我唔怕畀人界定我做乜，唱歌時我想做戲，做戲時又想唱歌，個天都對我好好，兩樣都可以輪住做。」
文：音樂組