葉玉卿親情可貴陪半癱母

葉玉卿、譚詠麟、陳友、彭健新及「港版Psy」錢國偉昨於邵氏片場拍攝賀歲片《我愛HK2013恭喜發財》，監製曾志偉亦有現身監場。劇情講述飾演銀行佬的錢國偉，到酒樓向為朋友「王危機」擔保的老闆譚詠麟收數，老婆卿卿即向他大表不滿，更當場胸壓威脅他！

拍攝期間，卿卿見到「冒牌Psy」更興奮合照，指其仔女最愛Psy，不過看港版的次數比正版多，認真畀面！首次與卿卿合作的譚詠麟，造型搞笑，他笑稱其長髮齊蔭髮型是由八両金剪，稱為「六両半」！

葉玉卿在片場坐在機動遊戲機上，成個大細路。

志偉現場指導陳友、阿強、錢國偉對戲。

搞笑有難度

對於事隔多年再客串演喜劇，卿卿坦言搞笑有難度，見傳媒廣泛報道既緊張亦有大壓力：「初時諗住嚟玩做兼職，冇乜壓力，點知接咗就後悔，因為要擺低啲仔女，但so far都好enjoy。（戲癮大會再接戲？）戲癮到當然會，但要睇檔期配合，就算我肯做，但做得差就唔好搞到人啦。」

卿卿表示此行回港最開心莫過於與半身不遂的母親享天倫，她說：「以前返嚟一大班人，留喺香港都唔耐，所以過去十年同媽咪見面都係一、兩餐飯。生完仔仔之後九年佢都冇飛嚟美國，呢半年佢身體好差又中風，都近九十歲啦，要多啲珍惜相聚時間。」

女兒跟埋返

視子女如命根的卿卿，拍攝期間無時無刻想起三個子女，又四處留影讓他們看，她大爆囡囡傳短片喊足三十分鐘兼發百個短訊給她施冧功，表示想死及無心向學，心痛得卿卿叫囡囡昨日飛來香港陪她。

另外，卿卿接受電視台訪問時，談到因太久沒見母親，曾被家姐責怪，她忍不住嗚咽說：「家姐話我唔係孝順女，我好唔開心，我話我一直有養屋企，家姐話媽咪要嘅係我返嚟陪佢，佢成日想同我食飯，我當時真係好難過。」

文：影視組