子珊楊怡爭后在即孖住跌Watt

徐子珊和楊怡身為今屆無綫台慶頒獎禮兩位「視后」熱門，昨齊到尖沙咀為TITONI瑞士梅花表專門店開幕禮剪綵，粉絲團分成兩批到場聲援，塞滿行人路，令途人頗有怨言。頒獎禮拉票進入直路，但兩位「視后」熱門齊齊跌Watt，子珊患感冒聲沙沙，拍照時鼻水直流，十分尷尬，結果笑容欠奉；楊怡面上則持續爆瘡，滿面粒粒，有礙觀瞻。自楊怡早前在馬來西亞先封視后，兩人首次在公開活動中碰頭，不過兩人表現友好，互笠高帽，又為對方揀選名錶，預祝對方稱后。

拍戲喊足六粒鐘

子珊受訪時否認前日缺席無綫的晒冷記者會為避楊怡：「如果公司要我出席，我病都嚟啦，但係公司好體諒，畀我去睇醫生先，尋晚拍賀歲片又通宵，仲要喊咗6個鐘，冇瞓加感冒，所以把聲都好難聽。」子珊指視后形勢平均，笑言想以絕招拉票：「可能派護膚品、衫禮券拉票。」談到粉絲阻街及鬥嗌偶像名字，滲出火藥味？子珊說：「等我一陣去安撫番啲街坊，同佢哋講對唔住，粉絲太熱情，佢哋嗌大聲啲都係想偶像聽到。」對於有指楊怡半價接活動抗衡她，子珊直言不信：「呢個時候有Noise加價啦，大家身價幾多就真係唔知喇。」

子珊與楊怡在活動上表現得十分「好姊妹」。

子珊與楊怡的粉絲互嗌撐偶像。

力撐粉絲無阻街

爆壓力瘡的楊怡指因內分秘失調加上到馬來西亞吃了太多熱氣食物所致，她透露今次與子珊拍檔剪綵，價錢比平時高，亦不介意與緋聞男友羅仲謙在聖誕節以高價情侶檔搵銀。講到粉絲阻街，楊怡說：「冇阻街，都驚佢哋有危險，叫佢哋企埋啲。」楊怡計劃稍後帶母親去東南亞旅行，但冇預羅仲謙。

採訪：影視組