Jessica C.女人香箍男友

「警鐘胸」女模Jessica C.向來愛情至上，與拍拖四年的舊愛Sergio交往時，即使女尊男卑，甚至貼錢供養男友，她都義無反顧。如此全情投入，故與Sergio分手後，令她一度對愛情失去信心，更決心以工作麻醉自己，寄情工作，把感情事拋諸腦後。但「窈窕淑女，君子好逑」，JC又怎可能沒追求者？事隔數月，她已走出陰霾，與洛杉磯型男Bryce Bond交往，正式成為「邦女郎」。

自製禮物感動伊人

「其實我之前真係冇諗過要再拍拖住，不過愛情往往係預計唔到嘅。如果係一早計劃好嘅，就唔叫做『墮入』愛河啦！」問到Bond如何打動她的芳心？JC嘴角含春地說：「其實早喺情人節嗰陣，佢知我冇情人一齊過節，佢就主動約我，估唔到佢仲準備咗一條自己染顏色嘅頸巾畀我，真係好驚喜。」

JC不介意行性感。

JC笑言每次返港前，都會於男友家狂噴香水。

對於物質生活富足的JC來說，與其送她自己都有能力負擔得起的名貴禮物，倒不如送份獨一無二、充滿心思的自製禮物，更能叫她動容。JC續說：「同埋佢好有耐性，追咗我好耐。我一直同佢講我哋只係朋友，但係佢一直都冇放棄，繼續約我。」Bond於約會前更會做足功課，預先計劃好約會行程，帶她遊山玩水。結果皇天不負有心人，Bond最終贏得美人芳心！

全屋狂噴香水奏效

雖然Bond誠意爆燈，但他們始終分隔兩地，難道JC就不怕「Out of sight, out of mind」（不在身邊，就不在心）？早已習慣遠距離戀愛的JC，毫不擔心對方出軌，反而認為小別勝新婚，二人會因而更珍惜與對方相聚的時間。「佢好信任我，無論喺香港有啲咩負面嘅新聞，佢都唔會理，只會默默咁支持我。」對於不能常伴男友左右，JC自爆有獨家撒手鐧，令身在洛杉磯的Bond時刻都會記掛着她。「我一向都有噴Dior果味香水嘅習慣，佢成日都讚我好香。所以每次我要返香港之前，我都會喺佢屋企周圍噴香水，好似喺書枱、衣櫃同枕頭咁，等佢聞到陣香味就諗起我。」

她笑言自己就像「空氣」般，無時無刻都在他身旁，續說：「有時同佢傾電話，佢會同我講佢突然好掛住我。我問佢喺邊，佢話瞓咗喺牀度，我就知我呢招係work嘅！哈哈！」

不修邊幅晒男人味

JC冧爆表示拍拖後，男友令她覺得自己變得更完美、更有自信，並甜絲絲地說：「佢好鍾意讚我靚，仲成日都話自己係呢個世界上最幸運嘅男人，可以有我做佢女朋友。」難怪JC近日常自信心爆棚、又搏盡性感地出席各大小活動，從她身上完全體現到「戀愛中的女人特別紅粉緋緋、明艷照人」的說法。雖然JC愈來愈靚，但她卻反而變得愈來愈不在意伴侶的容貌。「唔知係咪我大個咗，我完全唔介意佢嘅外表，不過我鍾意佢夠高，就算我着咗超級高嘅高踭鞋，佢都仲係高過我。」她笑言Bond是一個不修邊幅的人，但即使他連鬍子也懶得剃掉，JC也覺得這樣充滿男人味，果然「情人眼裏出西施」！

聖誕節見家長

向來愛錫家人的JC，早已跟家人宣布與Bond拍拖的消息。雖然仍未見家長，但當家人聽到Bond與JC的愛情故事，亦感到非常高興。「我哋聖誕節會返美國，我仲會帶佢去見我屋企人。我有一個哥哥，佢有兩個女，之前我其中一個妹妹生咗BB女，依家另外一個妹妹將會生BB仔！屋企終於有男仔！我相信大家一定會分外開心，所以都好想同Bond一齊分享呢個喜悅。」

習普通話登陸

揚言要以工作為先的JC，獨自在港期間全力進修，望提升自己的競爭力。她為了打開中國市場，正全力學習普通話，更一星期上兩節課。她笑言：「我淨係識讀啲好簡單嘅，好似『你很帥』咁。雖然發音唔算好難，但係啲聲調真係搞到我好頭痛！」若成功打通語言的隔膜，她深信必能為自己帶來更多工作機會。而她最渴望能演出笑片，為大家帶來歡樂。