傅嘉莉挖洞儲糧等「復活」
盛傳今年1221（2012年12月21日）是世界末日，圈中人都相信由天災導致，若災難真的來臨，卻又大難不死，應當如何重生？混血名模Mandy Lieu呼籲大家由自己做起注意環保，模特兒傅嘉莉會挖地洞，預先儲起幾年糧食等機會重生。
傅嘉莉
近年多咗好多天然災害，例如超級颱風、龍捲風、海嘯等，所以我覺得世界末日都會因為呢類問題而起。我哋可以喺地底挖洞穴生活，儲定幾年嘅糧食去避難，等待劫後重生。
張暖雅
我覺得未必會係世界末日，不過可以係喺世界某啲地方發生一啲大事，好似會有大風暴咁。
Mandy Lieu
我覺得最有可能係人類太唔環保，有天然災害同天氣突變搞到世界末日。依家每個人都要由自己做起，開始注重環保。
陳祉妤
我估最大機會係因為氣溫不尋常咁改變，例如變到好熱或者好凍，令到所有生物都生存唔到。
姚書軼
我認為有兩個可能性，一個係天氣大混亂，例如好凍嘅地方變到好熱，好熱就變到好凍，另一個可能係有隕石之類撞擊地球。不過我覺得世界末日唔代表所有人死晒，會有部分人仲生存，要靠佢哋重建地球。
周家蔚
聖經裏面有講，耶穌再降臨就係世界末日。不過我覺得喺地球上嘅人類都要做好自己本分，唔可以再污染世界。
許穎
如果1221真係世界末日，我會即刻搵個人結婚，因為未試過，生仔又趕唔切，咁就結婚啦！不過如果唔係末日可唔可以悔婚？我覺得世界末日地球已經變成月球冇晒人，所以都冇得重生。
森美
我其實寫咗個廣播劇個大結局係1221，至於世界末日後，我相信人類會回復弱肉強食嘅世界，到時應該幾恐怖。人類要掙扎求存，到時應該要保護自己愛嘅人先係大前提。