秋官化身占士邦 學友快閃搶鏡

顧嘉煇一連六場《顧嘉煇大師經典演唱會2012》前晚正式開鑼，一眾靚聲歌手謝安琪、葉麗儀、陳潔靈、凌波及羅嘉良等輪流上台獻唱。仙杜拉指煇哥很痛錫她，但將「承蒙錯愛」講錯成「成龍錯愛」，全場爆笑。她又不慎差點跌倒，幸有驚無險。

煇哥被爆多女追

久未露面的羅嘉良以「宅男」形容煇哥：「佢面相端正，少說話，而且足不出戶，屋企仲有6部電腦，煇哥仲唔夠宅？」凌波亦稱認識煇哥幾十年，但對話卻只得4、50句，又爆當年多女仔追煇哥：「因為佢寫歌畀邊個唱都會紅。」陳潔靈及葉麗儀撒嬌要煇哥創作一首合唱歌給她們，葉麗儀又稱曾到柬埔寨及越南開騷：「佢哋唔識葉麗儀，但係識《上海灘》！」身為特別嘉賓的張學友甫出場即掀起全場高潮，但唱畢《萬水千山縱橫》便匆匆離開，觀眾不捨大叫Encore。

張學友一出現即引來全場尖叫。

煇哥與眾歌手一同謝幕。

值得紀念的一晚

鄭少秋（秋官）穿上黑西裝化身占士邦壓軸出場，又唱又跳一連串經典武俠片主題曲，更加插槍戰場面，可謂寶刀未老。秋官透露單是衣服已幾十磅重，能抱起舞蹈員沒嘔血已算好彩。他又指煇哥才是其心目中大俠：「真正嘅大俠係煇哥，既豪邁又柔情，佢係隱世大俠。」最後秋官帶領眾歌手獻唱《獅子山下》作結，然後煇哥再度上台感謝大家：「多謝聽我嘅歌嘅人，再多謝歌手們。我記得係第一次聽到有咁多人唱我嘅歌，係最值得紀念嘅一晚。」

仙杜拉講錯成語，笑爆全場。

謝安琪高貴打扮演繹煇哥金曲，樂迷聽出耳油。