王馨平技癢開騷 瞄準紅館
闊別樂壇多年的王馨平（Linda）因客串電影人氣急升，連帶名曲《別問我是誰》都極速翻Hit，全城更倣效其MV中的蝴蝶手。有見及此，技癢多年的Linda決定先在九展開騷小試牛刀，反應熱烈的話希望可以升呢上紅館。
早年淡出樂壇的Linda坦言一直有意開騷，適逢早前客串電影而人氣急升，於是決定在2012年完結前搞演唱會以歌會友。連日來忙於為下月在九展舉行的演唱會排練的她，希望做到一個音樂性非常豐富的音樂會獻給「馨迷」。
必唱兒歌
Linda說：「真係估唔到首《別問我是誰》會因電影而翻Hit！同埋啲Fans都催我開騷，我覺得點都要畀啲交代佢哋。」她坦言感激好友周慧敏支持：「演唱會個名係佢幫我改嘅，同埋佢鼓勵咗我好多。個騷一落實我就即刻打電話畀佢，呢種友誼真係好難得！你都知女人要做決定需要好多動力，佢真係push咗我好多。」
Linda笑言準備了不少戰衣，更請了一隊勁Band，不過最緊要還是大唱金曲。她說：「我可能會唱陳奕迅嘅歌，因為我同老公都係佢嘅粉絲。」她又揚言屆時必會獻唱大家耳熟能詳的兒歌《生命有價》：「幾年前有粉絲見到我，估唔到佢竟然話最鍾意《生命有價》，真係好驚喜！」
樂意客串
近年Linda愛上打高爾夫球，因而結識不少知己，但作為演藝世家的她依然有一顆不滅的表演欲：「自己日常生活都會曲不離口，加上就嚟開騷，每日都會練歌。同埋如果有適合嘅劇本，自己都樂意客串過戲癮。」Linda坦言希望下次可在紅館開騷：「我有個小小心願，希望下次可以開紅館騷，到時請埋爸爸同妹妹嚟睇。」
文：音樂組
攝：司徒國榮