G.E.M.真空跳躍步步胸險

巨肺歌手鄧紫棋(G.E.M.)早前為拍睫毛液廣告,首次大膽真空上陣,拍攝時更跳來跳去,差點走光當場,G.E.M.更回憶當年同男友仔拍拖時,為了化靚妝而雞手鴨腳遲到赴會,搞到男友黑面當場。

正為明年演唱會籌備的歌手G.E.M.,以Maybelline New York品牌代言人身份拍攝新一輯睫毛液廣告,打造時尚專業教主造型。G.E.M.首次大膽地真空上陣,只穿白色西裝外套。活潑好動的她在拍攝期間不時跳來跳去,令在場的工作人員睇到好牙煙,多次提醒她小心走光。

由鄰家小女孩漸變Rock味甚濃的時尚教主G.E.M.,坦言改變與音樂的歌路有關,她說:「依家咁Rock係想配合番我嘅音樂,不過我平時唔使做嘢嗰陣都係以舒服自然為主,好記得啱啱入行時唔識化妝,之後慢慢喺化妝師身上偷師。」自言至少兩支睫毛液傍身的G.E.M.,說眼部化妝很重要:「就算平時出街唔化妝,都要用睫毛液掃一掃,成個人精靈晒!」她續說早前曾親手為客人化妝,對方大讚滿意,為她帶來無限的成功感。

化妝遲到激嬲男友

每個女仔與男朋友約會時,都想以最美麗的一面示人,G.E.M.回憶讀書時期拍拖亦不例外,她說:「有次同男友去街,想化個靚妝見佢,點知愈急愈雞手鴨腳,遲咗半個鐘先出到去,搞到男友都面黑黑,好彩佢知我一片苦心,係為佢而扮靚先搞到咁遲,所以好快冇事。」

文:專案組