阿Lam父子檔 趙增熹拖仔挑機

林子祥（阿Lam）和趙增熹昨日破格在舊冰室開記招，宣布明年2月將聯手在會展舉行2場《絕對熹祥A Mix & Match Concert with林子祥&趙增熹》演唱會。為配合Mix & Match主題，兩人即場炮製飲品鴛鴦，又分別準備了假鬍鬚和眼鏡送贈對方，兩人戴上後果然有幾分相似！贊助商知道v阿Lam喜歡攝影，除了特意送上相機外，還提議下次合作開影展，阿Lam隨即搞笑地說:「我要超越發哥！」而當贊助商送他一對皮鞋時，他就鬼馬地掏出一元回禮，引得哄堂大笑。

四面台拉近距離

他們表示今次會將紅館的四面台搬到會展，阿Lam繼續其搞笑本色說：「如果唔係坐到最後排嗰啲真係遠到睇粒豆！」而樂手將會是清一色女將，更請來盧凱彤負責彈結他，趙增熹笑言希望中和二人的佬味：「費事得我哋兩個男人咁Dry！」

一眾人在記招上大歎鴛鴦，預祝演唱會成功。

阿Lam獲贈皮鞋，隨後拎出一蚊作回禮。

雖然阿Lam表明老婆葉蒨文未必會上台唱歌，但兒子林德信就落實擔任嘉賓，而趙增熹則希望兩對父子檔可以同台比併：「我已經又呃又氹我個22歲仔上台彈琴，但佢仲未肯應承！」問到趙增熹可會再開金口唱歌？他就耍手擰頭：「上次唱咗啦，喺阿Lam隔籬唱我會好醜怪！」當提議他們合唱時，阿Lam即說：「我唔要同佢唱埕埕塔塔嘅歌，就算唱都唔會望住佢！」

文：音樂組