胡諾言首剪臍帶 添7磅半B女

藝人胡諾言及太太陳琪自2009年誕下長女胡芷苓後，胡仔昨日再度公布喜訊，太太陳琪順利剖腹誕下重7磅8安士的小千金，母女平安。胡仔大讚女兒可愛，說BB遺傳了他的耳朵和鼻，而嘴巴就似媽媽一樣。今次囡囡的名字亦跟長女一樣交由李丞責師傅負責改名，名為胡芷悠，意思是希望女兒活得悠然自得，他表示：「我唔使佢大富大貴，但希望佢做人活得輕鬆自在，冇壓力。」

雖然陳琪已非首次剖腹產子，但胡仔表示這次卻是他首次剪臍帶，他說：「之前聽人講臍帶好難剪，今次親手剪時發現原來臍帶係有韌度，個感覺好得意。第一下剪唔晒，有少少血流出嚟都驚驚地，自己都停咗0.1秒，但見到有個小生命喺面前，又驚佢冷親所以剪埋佢。」問到太太精神狀況如何？胡仔說：「開頭怕第二胎佢會應付唔到，因為佢有哮喘，呢幾日天氣又唔好，不過太太好堅強，一切安好。」

只請一天假

胡仔再為人父，但他坦言壓力反而更大：「因為自己工作好忙，11月要開劇，早兩星期又拍《愛‧回家》，12月頭都會離開香港兩星期做嘢，自己一直好擔心會撞期陪唔到太太，但真係要好多謝監製，畀我抽到時間出嚟，屋企人又有幫手。」

他亦直言養小朋友有壓力，故只請了一天假陪太太，明天又要再次投入工作，努力賺奶粉錢。但他亦大讚次女有福氣：「出世前已經有好多贊助商贊助佢，所以會輕鬆啲。」

至於大女胡芷苓亦非常愛錫妹妹，胡仔說：「佢今朝返學嗰時已經交帶落話要畀佢見小BB。咁我都有叫佢準備禮物畀妹妹，我又有代妹妹送禮物畀佢，希望佢知道我哋唔會偏心。」而產後的陳琪亦馬上上載照片到微博報平安，留言：「大功告成！」

文：影視組