李心潔爆炸逃生玉背遭殃
【蔡志豪廣州直擊】李心潔、古天樂和劉青雲前晚在廣州封街拍電影，貴為導演彭順太太的李心潔，拍攝時未有獲得優待。在其中一場爆破戲中，彭順嫌火太細要加大，令老婆感到玉背似被燒着，幸好醒目及時逃出火場。
古天樂、李心潔和劉青雲於導演彭順和彭發率領下，前晚在廣州封街拍攝新片《逃出生天》。電影公司出動十五部消防車、近六十名消防員及大批臨時演員扮演傷者、醫護人員，拍攝火災逃生場面，吸引半百途人圍觀。
彭順太多兼顧
李心潔雖然貴為導演彭順太太，但拍攝危險場面亦要親身上陣，未有受到優待。她憶述一場爆炸戲時猶有餘悸，指兩位導演拍了數次，仍嫌火太細需要加大。她說： 「啲火一爆我感到背部有團火燒緊，成個身熱到根本做唔到戲，導演未叫停我己經衝咗出去。我自己真係要醒啲！導演（彭順）亦叫我如果好熱，就第一時間跑啦！同埋有次吊威吔好大風，我怕吹咗我入火場。有次又跑街跑到仆低，痛到想喊，但太多人望唔好意思。」彭順坦言當日睇住老婆仆亦照顧不到，因現場太多事要兼顧。他說：「佢惟有繼續做。（叫人拉緊條威吔？）一講仲大鑊，即刻放繩o架！」
古天樂頻受傷
同場的古天樂坦言拍《逃》片時手部多次受傷，幸好不用縫針，他笑說：「受傷情況真實到我都唔使靠化裝！」而出爐金馬影帝劉青雲被問有否加片酬時，他笑謂：「當日笑言冇獎冇得加，有獎梗係加。（一千萬？）承你貴言，打工仔講吓笑，市場會有計算。」