伊健孖女友聖誕鬥機
鄭伊健昨日以大使身份出席「亞洲遊戲展2012」揭幕禮，大會安排一個小朋友與伊健打機對戰，但小朋友一見伊健即大賣口乖，更大讚伊健：「你女朋友好靚！」令伊健即笑逐顏開。伊健表示與女友蒙嘉慧已準備不少遊戲，打算打機過聖誕節，問到聖誕會否與蒙嘉慧撐枱腳？他說：「一定，但聖誕冇咩嘢食揀。（同女友煮飯仔？）我唔識，大家都麻麻哋。」
提到好友錢嘉樂奪金馬獎「最佳動作設計」，伊健表示已恭喜對方：「好開心，腳頭好好，嚟緊又有餐飯食！我哋有個群組，再約過所謂嘅秘密聚會。（學嘉樂生B結婚再好腳頭啲？）我不嬲都好，人要知足！」