陳嘉容暗角醉冧啜爆5分鐘
失婚五年的名模陳嘉容（Eunis），前晚被發現於中環夜店與一名比她年輕的南亞裔男子表現親暱，玩至凌晨3時，原本手拖手步出的二人，見記者即尷尬「分手」彈開，當行至暗角處時更情不自禁攬住激咀5分鐘，原本雙雙返歸繼續溫馨的Eunis未能撇甩記者，被迫與新歡各自回家。
現年37歲的名模陳嘉容，自07年宣布與髮型師老公郭子輝離婚後，曾先後跟幾位嫩男傳出緋聞，但她一直堅稱自己單身。而她前晚再被發現與一名年約廿多歲的南亞裔男伴到中環dragon-i消遣，場內見兩人經常連體嬰般黐到實，儼如熱戀中的情侶。
齊上的士走人
盡興至凌晨3時，身穿紅色外套的Eunis與南亞裔新歡手拖手步出夜店，但當見到記者拍照時，兩人即尷尬「分手」彈開，Eunis則只懂傻笑並企定定給記者拍照，期間男伴突然搞笑地用衫包住個頭遮面。其後他們以為擺脫記者追訪，當行至附近暗角位時，情不自禁又攬又咀，期間見男方雙手亦伸入Eunis的外套內，兩人激咀了5分鐘，正打算雙雙乘的士返歸繼續溫馨，但Eunis突然擰轉頭，見記者仍繼續拍攝，於是與男伴手拖手齊上車走人。由於好事被撞破，Eunis惟有先送男方返回中半山位於地利根德里豪宅，男方先行落車，但仍依依不捨兩度探頭入車廂與伊人擁吻後才返家，而Eunis則獨自返回堅尼地道寓所。
自爆好想拍拖
昨日記者就與南亞裔新歡當街激咀一事致電Eunis，她說：「我同佢都飲醉咗，同佢只不過係朋友。佢係追我，睇大家有冇緣分囉！（男伴點稱呼？）S君。總之依家未係男友，我一直都好想拍拖，但佢為人好低調。（佢追你接唔接受？）睇吓溝唔溝通到。我同佢差唔多年紀，尋晚第一次同佢去夜店飲嘢。」
文、攝：追蹤組