戚美珍改造啟華曲線氹老公

戚美珍(三嫂)最愛的當然是老公苗僑偉(三哥),但私下最崇拜的卻是「程至美醫生」吳啟華,三嫂打啟華主意,邀演舞台劇,希望憑她大膽的創作,將溫文儒雅的「程至美」變為瘋狂搞笑的人物,向來Cool爆的啟華要是能被三嫂「將冰山劈開」的話,三嫂也不求甚麼報答,只笑說:「打Golf讓我老公得o架啦!唔使佢輸波哭喪咁樣!」

一句留言 冧到暈晒

啟華雖然有女萬事足,但他亦打算追多個,是仔是女就交由個天決定,因目前已被女兒甜言蜜語籠罩的啟華,要是再來多個女的話,相信更被氹得暈晒大浪。據啟華透露,囡囡快四歲,已經識得用微信跟爸爸聯絡,啟華笑言每次聽到囡囡的訊息都由心笑出來:「我成日都周圍飛做嘢,其實唔係好多時間湊個女,長途電話又唔講得咁多,電話費太貴啦!依家資訊科技咁發達,我已教識我個囡囡用微信,好簡單,撳住就講得嘢,每次我出Trip,囡囡就傳好多微信畀我,話:『好想念你!』、『你忙甚麼?』、『要照顧自己……』呢啲咁冧嘅說話,就算幾忙、捱得幾辛苦,一聽到都冧晒啦!又有足夠能量去搵奶粉錢!」

臨時拉伕 騎呢踢波

戚:我以前移民加拿大時已經追睇《妙手仁心》,好鍾意「程至美」醫生呢嗰角色,今次因為搞舞台劇,有一個傻嘅醫生角色,我咪打你主意,我知你唔係一舊冰嚟嘅!

吳:我從來未做過舞台劇,都好驚o架!但我抱玩嘅心態,嘻嘻哈哈啦!今次係搞笑版程至美,觀眾可能幾有新鮮感,不過,我以前都有演過喜劇,我可以好放。

戚:我同你唯一有同劇合作嘅係1990年亞視劇《還看今朝》,但真正有交情都係呢幾年你同我老公打波。相處落知你原來好好笑,有次志偉叫你落場踢足球,我見你好認真咁講話自己唔識踢個樣……真係超搞笑,一副斯文樣、戴金絲眼鏡仲着埋短褲,對腳又瘦……令我諗起周星馳電影《少林足球》嗰個攞住「士巴拿」都話好正常嘅演員,哈哈!

吳:《還》劇我同你冇同場印象唔深,但我最深刻反而我未入行時就追睇你同三哥嗰套《飛越十八層》,嗰陣我讀緊書,後來考入訓練班,之後喺台見到你,當然好靚啦,阿姐嚟喎,距離好遠,我哋呢啲o靚仔,邊有機會合作?後來同三哥打波先有機會接觸,我見到你同三哥老夫老妻仲咁恩愛,真係好難得,要學習、學習!

夫妻之道 見步行步

戚:大家走投無路啫!其實夫妻相處之道,係行一步學一步。

吳:有次我哋去泰國打波,三哥喺餐廳等你,你塞車又未到,三哥真係坐唔安企唔樂!

戚:講起嗰次我同三哥幾乎鬧交,我塞咗車成三個鐘,我太了解佢,知佢一定好緊張,要Hold住啲人唔叫餸,我又唔想佢哋等,三哥話:「唔等你唔得!」搞到我仲急!

吳:畀我哋……唔嚟就唔使理,唔會等添!我睇住你兩公婆有好多嘢學,好似你哋兩個仔、女真係好乖,依家新一代好惡,我見過一個女仔,大庭廣眾鬧個老竇,一啲禮貌都冇,真係想兜巴摑。

戚:教仔女其實係心靈溝通,你個女都乖到不得了,啟華你又對爸爸、媽媽好有孝心,有次我哋約你食飯,你話要同爸爸去釣魚,呢個年代都仲可以咁有耐性去陪爸爸先叫孝道,溫情維繫係可以一代傳一代!

戚:戚美珍 

吳:吳啟華文:影視組 

攝:吳文聰