應昌佑娶100分老婆
久未露面的歌手應昌佑昨日與拍拖９年的圈外女友Mandy拉埋天窗，在半島酒店註冊結婚，婚禮過程簡單而隆重，一對新人明日會移師到鄉村俱樂部擺酒。
歌手應昌佑昨日小登科，與拍拖9年的圈外女友Mandy結束愛情長跑，兩人低調地在半島酒店註冊結婚，明日再移師到鄉村俱樂部擺酒。新娘子打扮清雅，露肩婚紗配上珍珠頸鏈和耳環，手執設計簡單的滿天星花球。一對新人一切從簡，既沒有兄弟姊妹團傍住，接新娘時又不設玩新郎環節，註冊儀式亦只是邀請小部分親朋好友，未見唱片公司老闆及藝人出現。應昌佑表示有派帖給老闆黎明:「飲嗰餐佢有心嚟就得o架喇，希望佢得閒啦！」
應昌佑大讚老婆100分，不過卻被老婆踢爆他眼淺，怕他註冊時會忍不住落淚，應昌佑則自爆接新娘時的蝦碌事︰「我去接佢嗰時佢都仲未化好妝Set好頭！」兩人大晒手上的巨型鑽戒，新娘子左手無名指戴着銀色閃爆鑽戒，應昌佑則在右手尾指戴有金色鑽戒，他表示︰「佢嗰隻係奶奶送嘅求婚戒指，我嗰隻就係爸爸留畀我嘅家傳之寶。」可見曾是紅極一時的台灣「低音歌后」應媽媽冉肖玲對新抱寵愛有加！
歐洲度蜜月
一對新人表示希望到歐洲度蜜月，應昌佑說︰「我自己就想去法國，不過要得大家得閒啲先，結婚後我哋都要做嘢。」那造人大計豈非要押後？應昌佑說:「小朋友係絕對會考慮嘅，一步一步嚟，搞好個婚禮先！」
文：音樂組