鄧麗欣硬淨：抗抑鬱1年
鄧麗欣在娛樂圈打滾多年，經歷過不少風浪，幸好性格樂觀的她仍能堅強面對。多年來最為「重創」的，是一首《電燈膽》令她抑鬱了足足一年，久久未能康復。
我在娛樂圈發展多年，當中經歷過好多人和事，梗係會有喜和樂，亦難免有不快。過往出現喺我身邊嘅新聞，不外乎緋聞、不和，其實呢啲新聞對我係有影響，但影響性唔係最大。印象最難忘當年我推出咗首歌《電燈膽》，外間反應好大，好多有關我走音嘅新聞，跟住我籌備07年尾演唱會，好多工作喺身搞到個人好瘋癲，仲要接受外界批評，令我真係好大壓力，好唔開心搞到個人有抑鬱，但好在未演變到病。當時好怕再上台表演，見到人多地方會都驚，有人群恐懼症、好怕見到媒體接受訪問，因為怕第二日睇報紙又係講我。為呢件事我喊過，控制唔到自己。整件事困擾咗我一年時間，好在我樂觀調節到，知道係要靠自己控制情緒先會治理到。當然仲要多謝圈中朋友、家人都好撐我。
嘆網民殺傷力大
當然方力申都有份支持，但幫唔到好大，哈哈，但有佢講句都好啲，知有個人喺身邊支持自己。事件令我覺得呢個年代網民嘅影響力好大，自從興起咗網民呢個風氣，我都唔睇、唔留意討論區，因為覺得虛擬世界裏面啲言論好主觀，有啲仲會好自私，會影響到好多人。雖然經歷過咁多，但我都無諗過放棄娛樂圈，可能會係有一秒諗過嘅，但好快又無咗。我份人夠樂觀覺得凡事有解決方法，千祈唔可以遇到問題就放棄，咁會好對唔住自己同身邊嘅人，我夠硬淨，頂得住。
口述：鄧麗欣
筆錄：影視組