鄧麗欣:我o地唔係敵人
鄧麗欣曾在組合Cookies時期，以隊長身份率領八位成員在樂壇大放異彩。可惜解散後卻傳出與成員不和傳聞，當中傅穎更是首當其衝成為公敵。鄧麗欣坦言大家不是好朋友，但不代表是敵人，令她最不開心反而是被描寫到她很霸道。
Cookies解散後，幾個女仔獨立發展，部分成員就退出幕前，大家見面時間少咗，各有各忙。以前經常走在一起，現在各自忙碌，可能因為咁令外界覺得我哋關係大不如前。我承認在娛樂圈的朋友不多，可以數得到的有吳雨霏同區文詩（Angela），好多人話我朋友唔多，好多人話我Cool，我唔係，我只可以用慢熱嚟形容。
點頭交難持久
其次我唔出去玩，唔會有夜生活，每日工作完都只係返屋企。做娛樂圈呢行，在活動上見到同行都係一做完活動就各自離開，趕住出席另一個活動，可能只係做到Hi and Bye，點個頭，大家都係呢行應該會明白，所以好難去發展深厚友情，就算傾到兩句但下次又唔知幾時再見，好難保持好朋友的關係。
我同傅穎的關係外間講咗好多年，來來去去都係話我同佢不和，呢個傳聞愈傳愈厲害，寫到我哋水火不容、有佢無我。我可以咁講，我哋唔係好朋友但唔代表係敵人，相信每個人身邊都會有呢種情況。反而事件令我覺得，事件寫到我好似好厲害、好霸道，我有因為咁而唔開心，因為原來真係會有人相信呢啲消息，如果一百個人當中有一個人信，對我影響都會好大。而我解釋過好多次但傳聞都係繼續運作緊，我只可以做的是清者自清，用時間證明一切，用時間去證明我係個乜嘢人。
口述：鄧麗欣
筆錄：影視組