陳靜：入得行預咗畀人講
「百果園咪神」陳靜（DaDa）已經上岸脫離寫真o靚模行列，投身演藝界，繼《喜愛夜蒲》後，早前熱爆的港產片《低俗喜劇》已成為她的代表作，她在戲中飾演在娛樂圈出賣肉體換取演出機會的胸模，有人會猜想o靚模出身的DaDa是否靠同樣方式上位？女權主義超強的她說：「我預咗，入行係包埋。」
仍要sell性感
我之前拍嗰兩部戲對手都係年輕人，第一部係《潮性辦公室》，之後係《喜愛夜蒲》。之前出寫真入行，其實只係我嘅踏腳石，我希望多啲觀眾認識我，多啲工作機會，冇諗過話要去做演員，嗰兩年完全冇人生目標，好迷惘……直至工作增多，開始接觸電影，真正令我愛上做戲係《喜》片。
戲裏面我個角色幾大膽，有好多幾激嘅床戲，其實都擔心女仔觀眾會唔鍾意。就算之前影寫真係性感形象，但同拍戲係完全唔同。拍戲要放感情落去，如果唔放就不如唔好做，係好需要演到個角色嘅神髓。好在對手係我前男友，大家就算分開仍然係朋友，佢好保護我，我亦好信任佢，所以拍出來效果好自然，feedback返嚟知道好多女仔唔會因為咁而唔鍾意我，真係好感激！
所以今次《低俗喜劇》都有問導演（彭浩翔）點解搵我做「爆炸糖」，佢話就係睇咗《喜》片，想畀機會我去做更多深入啲嘅戲。有好多人問我：「想唔想做一個唔使性感嘅角色？」，我答：「我真係好想。」但我知自己未到，未有經驗、未說服到人，但我覺得如果叫做紅咗，而去封胸收埋性感，咁即係話我以前做嘅嘢係啱。
唔受得閒氣
做戲最開心就係做到唔同嘅自己，做演員唔應該去揀角色。依家喺出面會聽到好多關於有女藝人出賣身體去換取演出機會嘅古仔，自己都畀人講過，我預咗，入行係包埋o架喇！不過我好樂觀，亦好善忘，好嘢衰嘢都好快唔記得，都係一個優點，哈哈！我唔會信非親耳聽到或親眼睇到嘅嘢，我唔會好介懷。咁有冇呢樣嘢存在？我唔可以肯定話冇，但唔係大家諗到咁差。每人價值觀唔同，我唔可以話佢哋唔啱。
有人問我會唔會同富二代一齊？我係靠自己努力同性感出嚟，唔會靠邊個上位，唔會對唔住任何人。同埋我受唔到人哋氣，我比較女權主義，唔可以聽晒男友講嘢，我要公平對待嘅愛情。
秘方幾得意
做到「爆炸糖」呢個角色真係好開心，其實佢係一個好單純女仔，認為喺娛樂圈出賣身體，同監製或者男演員發生性關係，就可以換取演出機會。而「爆炸糖」呢個花名嘅由來，係喺歡娛時候，用爆炸糖為對方服務，係佢嘅獨門秘方，我覺得幾得意，係真人真事！
好多人問有冇一個真正指導說明？我都唔知，哈哈，未試過！同阿澤（杜汶澤）好多對手戲，但因為係一套喜劇，所以唔會尷尬。佢係一個好資深嘅演員，佢同導演都畀咗好多意見我，畀咗好多空間我，例如：人物個性、特質都畀我自由發揮。第一日拍嘅時候差啲想喊出嚟，成日NG，阿澤都話：「如果唔係DaDa嘅話，呢套戲八日就拍完。」
抵食呢行飯
擁三圍33D、24、34豐滿身材的陳靜，年紀僅得23歲，無論說話談吐抑或言行舉止都成熟大方，加上模特兒工作和演戲，樣樣皆精，抵她食正這行飯！她因為《低俗喜劇》由香港紅到台灣，中港、亞洲四圍飛，繼續進行吸金大計。不少宅男粉絲仍然萬分期待DaDa的新作，相信一定不會令所有粉絲們失望。
咪神到女神
十多歲已當part-time模特兒拍攝平面廣告，其後DaDa因與陳柏宇拍攝《百果園》電視廣告而人氣急升，被稱為「百果園咪神」。雖然以行性感推出寫真集入行，但現已脫離寫真o靚模行列，DaDa是繼曾以「牙膏滴胸」的周秀娜後第二位成功上岸投身演藝界的女神，並擔任女主角。
口述：陳靜
筆錄：馮雪怡
攝影：沈健程
服裝及場地：Twist（尖沙咀）