懷胎接近7個月的周家蔚最近與老公洪天明影全裸大肚寫真，為十月懷胎留下回憶。當日兩人全裸上陣沒有感到尷尬，原來在家中訓練有數，天明平日不時為愛妻拍攝全裸大肚照。
洪天明與周家蔚今年3月拉埋天窗後，迅即宣布造人成功，愛情結晶品「TJ」將於明年1月出世。近日，家蔚便挺着接近7個月的大肚，與天明到影樓拍攝全裸大肚寫真留念，兩人拍攝時也落落大方，沒有尷尬，更不用清場拍攝，家蔚說：「攝影師係我哋嘅朋友，現場反而女仔多，老公都冇尷尬，大家未拍前就用毛巾遮住身體，擺好甫士就影相，好滿意，好有紀念價值。」
當日拍攝過程非常順利而且駕輕就熟，原來家蔚平時在家，已練習過影全裸大肚寫真，由「御用攝影師」天明操刀，她笑說：「我喺屋企成日逼老公幫我影相，成龍之前送咗部名貴相機畀我哋做結婚禮物，所以有時沖完涼或工作完有化妝，就叫天明幫我影相。」問周家蔚可擔心珍藏裸照有機會流出？她說：「唔擔心，會好好保管，其實全部相喺冇露點嘅，只係想要赤裸嘅感覺，萬一流出，都唔係話好嚴重嘅事。」
除了全裸照，其他的溫馨照片亦曝光，其中一張照片是天明赤裸上身，親吻老婆肚皮的情深甫士；而另一款天明則「師傅」上身，督促愛妻紮馬練功，相當趣怪！
囝囝TJ預計明年1月28日剖腹生產，但家蔚也心大心細，希望嘗試自然分娩，她說：「到時都要睇BB嘅情況由醫生決定，想自然分娩係因為希望身體康復快，可以快啲再追多個女。」至於，TJ的中文名則由爺爺洪金寶改名，家蔚希望兒子的中文名似老公天明一樣簡潔。
文：影視組