黎燕珊出招羅霖當透明

由亞姐組成的仁美清叙昨晚在大埔亞視總台舉行慈善晚宴，主席羅霖、會長黎燕珊與歷屆亞姐黎淑賢、姚嘉雯、韓燕、顏子菲及許瑩等均有出席，李彩華（Rain）及湯寶如擔任表演嘉賓，應屆亞姐則穿上印有師姐們肖像的旗袍，十分騎呢！日前羅霖與黎燕珊隔空罵戰，Rain則曾力數羅霖任其經理人期間完全冇接Job卻照抽佣，昨晚三人同場，羅霖可謂腹背受敵！

黎燕珊戴上三千萬元鑽飾，撼贏戴五百萬元珠寶的羅霖，兩人被邀合照期間更零交流，但照交戲擠出笑容！Rain則與母親、好友趙雪英及其女兒拉大隊撐黎燕珊，並表示看不到羅霖，更寸爆說：「我見到會打招呼，有禮貌o架嘛！我今次嚟撐珊姐嘅，絕對支持佢！（夾擊羅霖？）你哋諗o架咋！」

黎燕珊行經羅霖時，未知有心或無意，竟出「手槍」指住羅霖！	黎燕珊拖實亞視高層葉家寶，盡顯地位。	黎燕珊邀請曾與羅霖鬧翻的李彩華撐場。

「我哋係好朋友」

全晚甚風騷的黎燕珊多謝Rain不收錢撐場，並指獲不少師妹支持，問與羅霖是否已冰釋前嫌？她說：「大家有見面，但未有時間詳談，之後朱慧珊會約大家傾吓。（係朋友？）我冇敵人，我離婚後有信仰，要愛自己唔喜歡、傷害自己嘅人！我哋係好朋友，可能佢呢排心情比較波動！」

行頭略遜的羅霖則表示最緊要靚及可以Carry名貴首飾，問到覺得黎燕珊是晚美不美？剛與黎燕珊合照的她竟當對方透明：「未睇到佢喎！」對於與Rain同場，她表示會打招呼，因做人不應記仇。提到有指羅霖以仁美名義到黑龍江探訪時帶亞姐陪客，黎燕珊認為情況應該不太嚴重，但有亞姐向她呻攰，羅霖則解釋活動由內地當局安排，沒聽過有人不滿，但知道是誰爆料。

拒絕工作遭雪藏

此外，換上晚裝的Rain上台獻唱後，在台下突然就前老闆林小明最近的官司開腔，她承認對方年前為她安排合約以外的工作：「我拒絕咗，之後被雪藏，我就同趙小姐（趙雪英）講要離開公司，多謝佢一直幫我安排工作，有需要會出庭作證！」趙雪英則指05年3月時身家被轉名，前夫林小明曾稱會轉回給她，但一直沒有，更對她惡言相向，她稱不怕爆料影響官司：「係佢講先，我先講！」林小明昨晚在電話中透露一切已是舊聞：「誹謗我嘅言論會追究到底。」對趙雪英請來囡囡男友的胞兄做大狀，林稱不清楚律師背景。

文：影視組