李詩韻新歡曝光尷尬舉V
現年31歲的無綫姐仔李詩韻向來異性緣極旺，身邊男伴如車輪轉。前日她親自接載身材高大的新男伴歎下午茶，兩人鬼祟地全程前後腳出入，邊食邊吹水，歎足個半鐘。及至發現被記者撞破，李詩韻先是一臉尷尬，繼而舉起勝利手勢遮面，相當煞有介事。
港姐出身的李詩韻，自從兩年多前宣布和鄧健泓分手後，身邊一直不乏追求者。不時被拍得與不同男伴夜蒲的她，近日雖然忙於宣傳新劇《大太監》的她，前日下午4時卻被發現抽空駕駛其火紅色座駕出現中環，直駛荷李活道。當車停定後，乘客位車門隨即打開，一名身材高大、穿上黑色恤衫襯牛仔褲的斯文男子由車內步出，快步地走入附近一間餐廳。
前後腳避影合照
李詩韻待新男伴進入餐廳後才施施然下車，刻意製造前後腳，避免被拍到合照。見穿熱褲的她急急腳步入餐廳，然後熟悉地登上樓上雅座。李詩韻和男伴「上樓」開餐，避開樓下閒雜人等視線，浪漫地慢慢邊食邊傾，一餐下午茶竟然食足個半鐘。
及至食飽之後離開，兩人又再小心地玩前後腳。大約5時半左右，李詩韻先行落樓，迅即發現記者鏡頭，她先是愕然，繼而一臉尷尬，定過神後做出勝利手勢及遮面，然後又打電話似向新歡通水。為免「同車」洩露親密關係，她不惜火速取車，撇下新歡絕塵而去，相當蠱惑。
李詩韻事後接受電話訪問，她指該男士是相識多年的朋友：「佢喺上海嚟一日，我帶佢去飲咖啡咋！（男友？）邊有咁多男友呀？佢只係我一個識咗好耐嘅朋友，當日我見到你哋影相，我事後咪話畀佢知，仲同佢講唔好意思要佢見報。」
文、攝：追蹤組