吳卓羲為操啤 貼錢衝雲霄
吳卓羲（Ron）「貼錢」為無綫劇集拍外景，他透露原本坐經濟客位，但要跟張智霖和吳鎮宇玩啤牌，故自掏腰包轉坐商務客位，保守估計要花上數萬元於機票及住宿上。問到會否期待有艷遇？Ron抵死地自稱鍾意「唐生菜」，對「西洋菜」興趣不大，刻下樂於享受單身生活。
Ron、劉松仁、楊怡、馬賽及朱晨麗等昨日為主演劇集《名媛望族》宣傳。Ron最近忙個不停，日內又要出發往歐洲為新劇《衝上雲霄Ⅱ》拍外景。問到屆時會否大出血Shopping？他說：「未出發都出咗血啦！因為贊助嘅航空公司英國線停飛，公司要改用其他航空公司，本來安排我坐經濟客位，點知坐Business嘅Chilam（張智霖）同吳鎮宇話要同我玩啤牌，所以自己用咗幾萬蚊嚟Upgrade囉！」原本獲安排雙人房的Ron還要補貼房價，才能住進單人房，今回出埠公幹果然「流血不止」。不過樂天的他表示：「到時一定要屈Chilam請食飯，攞番啲油水！」
劉松仁唔恨做視帝
Ron又透露有朋友移民當地，今次歐遊可趁機敍舊。回復單身的他被問會否期待有艷遇？他謂：「吓？我鍾意食唐生菜喎，西洋菜唔啱！（心急拍拖？）做嘢先。（傳你就嚟約滿無綫。）合約仲有一段時間，不過的確有內地製作公司向我招過手，但要留喺TVB，遲啲先算啦！」
同場的劉松仁被指是今年視帝黑馬之選，他笑言不想攞獎：「人怕出名豬怕肥呀，我淨係想做戲，今次都好緊張睇吓自己有咩不足嘅地方。（再拍劇？）TVB冇搵，有劇就想拍。」對於日前緋聞被炒熱，松哥沒好氣謂：「嗰張相今年2、3月影落嘅，依家先攞出嚟登！個女仔當時有咗，我扶吓佢，依家人哋連仔都生埋嘞。（老婆詐型？）唔會，大家都識。」朱晨麗則再次否認與港男李晉強同居，並自爆萬聖節當晚與大班朋友夜蒲，結果被狗仔隊影相，擔心有人大造文章。
文：影視組